Mətbuat-Monitorinq 16.11.13

Rəsmi və iqtidaryönlü qəzetlər dövlət başçısı İlham Əliyevin Bakı və Azərbaycan Yeparxiyasının Pravoslav kilsəsinin Dini-Mədəniyyət Mərkəzinin açılışında iştirakı haqda yazır.

“Azadlıq” qəzeti ağır maliyyə durumu üzündən noyabrın 12-dən fəlaiyyətini dayandırmağa məcbur olmuşdu, qəzet ictimaiyyətin dəstəyilə noyabrın 15-dən fəaliyyətini bərpa etməsini ilk səhifəyə çıxarıb.

Tanınmış araşdırmaçı jurnalist Xədicə İsmayıl iqtidarın “söyüş söyən”i olan “Səs” qəzetinə qarşı məhkəmə davası açıb, ilk proses noyabrın 19-na təyin edilib.

ABŞ-ın Azərbaycanda səfiri R.Morninqstar gələcək ABŞ-Azərbaycan danışıqlarında “demokratiya və insan haqlarının müzakirələrin əsas hissəsi olacağı” bəyanatı səsləndirib. 

Metroda mətbuat yayımı ilə məşğul olan “Metroservis”in rəhbəri Bəkir Cəfərov fəaliyyətlərinin dayandırılması barədə yazılı qərar olmadığını, bunun “kiminsə sifarişi əsasında” baş verdiyini söyləyib.

“Ekspress” qəzeti İran tərəfin noyabrın 7-dən bağladığı Azərbaycanla keçid Biləsuvar və Şahtaxtı məntəqələrinin fəaliyyətini noyabrın 15-dən bərpa edib.

Beynəlxalq Valyuta Fondu və Dünya Bankı Azərbaycan maliyyə sektoruna qiymət verilməsini bir il təxirə saldı.

Mərkəzi Bank ölkə banklarına ümumi kapitallarını 50 milyon manata çatdıra bilmək üçün verilən vaxtı daha bir il uzatdı.

“Novoe Vremya” qəzeti Azərabycanın da yer aldığı “Şərq Tərədaşlığı” ölkələrinə ABŞ və Avropanın münasibətinə dair ABŞ Senatında keçirilən dinləmələri “ABŞ-ın yenə də Azərbaycanı barmağı ilə hədələməsi” hesab edir. 

“Azadlıq” və “Yeni Müsavat” qəzetlərinin ağır maliyyə durumu üzündən fəaliyyətlərini dayandırmağa məcbur olmalarını qəzet “qəzetlərin “maliyyə boğuluşu”nun davam etməsi” adlandırır.  

“Bizim yol” qəzeti Milli Şuranın sədri Rüstəm İbrahimbəyovun siyasi partiya liderlərinin quruma sədr ola bilmələrinə “liderlər həmsədr olsalar Milli Şuranı məhv edəcəklər” şərhi verməsini ilk plana çıxarıb.

“Yeni Müsavat” qəzeti iqtidar ekspertlərinə isnadən keçmiş müdafiə naziri Səfər Əbiyevə məxsus evin dağıdılmasını “deklarasiya”da mal varlığını gizlətməsilə əlaqələndirir. 

Qəzet Bakının Baş Planına və “İpək Yolu” layihəsinə görə Alatava qəsəbəsində yüzlərlə evin söküləcəyini, sakinlərə isə min manatdan da az kompensasiya ödənməsi nəzərdə tutulduğunu yazır.