Yazıçılar metroda kitab satışının qadağan edilməsinə qəzəblənməyiblər

Şənbə günü Bakı metrosunun stansiyalarında qəzet, jurnal və kitab ticarəti tamamilə dayandırılıb.

Dünən dövri mətbuat satışı ilə məşğul olan “Metro-servis” firmasının rəhbəri etiraf edib ki, ona metroda dövri mətbuatın satışını dayandırmağı əmr ediblər. Prezident Administrasiyasının ictimai-siyasi şöbəsinin müdiri Əli Həsənov isə faktiki olaraq etiraf edib ki, çap məhsulları satışının dayandırılması haqqında qərarın təşəbbüskarı hakimiyyətdir.

Onun sözlərinə görə, metro qəzet və kitab ticarəti üçün heç də uyğun yer deyil və bütün bunlar indiyədək qanunsuz idi. O, həmçinin bildirib ki, metroda satışın dayandırılması qəzet tirajlarına təsir etməyəcək, qəzet almaq istəyənlər başqa yerdən də ala bilər.

Bu fikirləri Turan-a şərh edən Media Hüquqları İnstitutunun (MHİ) direktoru Rəşid Hacılı bildirib ki, metroda satışın qadağan edilməsi ifadə və informasiya azadlığını məhdudlaşdırır.

“Qadağa üçün yeganə əsas təhlükəsizlik və ya sərnişinlərin hərəkəti üçün problemlər ola bilər. Amma bu halda bütün ticarəti qadağan etmək lazımdır”, deyən Hacılı əlavə edib ki, MHİ bu qadağa ilə bağlı məhkəməyə müraciət etmək niyyətindədir.

“Qanun” nəşriyyatının direktoru Şahbaz Xuduoğlu metroda qəzet və kitab satışının qadağan edilməsindən təəccüblənib. “Bütün dünyada, hətta elektronika mağazalarında kitab satılır. Metroda qadağan edilməli olan bir şey varsa, o da “20 yanvar” və “28 may” stansiyalarında sərnişinlərin hərəkətini çətinləşdirən hər şeyin ticarətidir.

Bakıda onsuz da kitab satılan yer azdır və insanlar ən çox metroda kitab alırdı.

Bu, əhalinin mədəni-təhsil səviyyəsinə də güclü zərbədir və bu tədbirin ləğvinə nail olmaq lazımdır”, deyə Xuduoğlu bildirib.

Azərbaycan Yazıçılar İttifaqının sədri Anar metroda çap məhsullarının satışının qadağan edilməsi ilə bağlı şərh vermək xahişinə qısa cavab verib: “Əbəs yerə belə etməyiblər”.

Yazıçılar İttifaqının katibi, bir çox kitabları daim metroda satılan Çingiz Abdullayev məlumatı olmadığına istinad edərək, şərh verməkdən yayınıb.

Dünyanın bütün xüsusi xidmətləri haqqında sirlərdən xəbəri olan Abdullayevin Bakı metrosundakı vəziyyətdən xəbəri yox imiş.

“Bu barədə eşitməmişəm. Mən hüquqşünasam və hər-hansı mövzuda şərh verməzdən əvvəl dəqiq məlumata malik olmalıyam”, deyən Abdullayev əlavə edib ki, vəziyyətlə bağlı yalnız bazar ertəsi şərh verə bilər. -06С-