Mətbuat-Monitorinq 17.04.13

Rəsmi və hökumətyönlü qəzetlər dövlət başçısı İlham Əliyevin Hacıqabul və Mingəçevirə səfəri, səfər çərçivəsində obyektlərin açılışında iştirakı haqda yazırlar.  Dövlət başçısı “Qız Qalası”nda bərpa işlərinin sürətləndirilməsi üçün 2,5 milyon manatın ayrılması haqda sərəncam imzalayıb.

“Yeni Azərbaycan” qəzeti “EL” hərəkatını təhqir və böhtana məruz qoyan bir neçə məqalə dərc edib.

“Azadlıq” məmurların PA rəhbəri Ramiz Mehdiyevi ad günü münasibətilə təbrik etməmələri məsələsini manjetə çıxarıb. 

İran parlamentində Azərbaycanın İrana birləşdirilməsilə bağlı səslənən təklifləri bəzi iranlı parlamentarilər Bakıda martın sonlarında keçirilmiş Güney Azərbaycanla bağlı tədbirə cavab adlandırıblar.  

Yasamal Rayon Məhkəməsi “Azadlıq” qəzetinin hesabına həbs qoyub. Məqsəd Bakı metropoliteninin rəhbəri Tağı Əhmədovun qəzetə iddiasını təmin etməkdir.

İncəsənət Universitetinin kafedra müdiri, professor İlqar Hüseynovun iki dərslik kitabı plagiat çıxdığı üçün Təhsil Nazirliyi dərsliyin qrifini ləğv edib.

“Zerkalo” neft və qızılın qiymətinin kəskin aşağı düşdüyünü yazaraq bununla bağlı Azərbaycanda büdcə probleminin yaşana bilməsi barədə xəbərdarlıq edir.  

“Ekspress” yazır ki, PA ictimai-siyasi şöbəsinin müdiri Əli Həsənov rəsmi Bakını tənqid edən QHT-ləri “bəzi dövlətlərin sifarişini yerinə yetirməkdə” ittiham edib. 

“Exo” ölkədə taksi bazarının illik həcminin 720 milyon manat olduğunu yazaraq bunun da əksər hissəsini qeyri-leqal taksiçilərin təşkil etdiyini bildirir. 

“Bizim yol” Mərdəkanda polis əməkdaşının hamilə qadını ölümcül döyməsini ilk səhifəyə çıxarıb. 

Biləcəri qəsəbəsində binaların üzərinə “Hicaba azadlıq!”, “Dinimizi əlimizdən heç kim ala bilməz!” şüarları yazılmasını qəzet “dindarların orijinal” aksiyası adlandırır. 

Qızılın dəyərinin 13% azalmasını qəzet Neft Fondunun “qızıla yatırdığı sərmayənin batması, dövlətin pul ehtiyatlarının bölük təhlkədə olması” kimi qiymətləndirir.

“Yeni Müsavat” prezidentlik müddətinin 7 ilə qaldırılmasına hazırlıq getdiyini iddia edərək bunu “gizli seçki planı” adı ilə ilk səhifəyə çıxarıb. 

Fövqəladə Hallar Nazirliyi ölkənin zəlzələ baş vermiş Qax, Zaqatala, Balakən rayonlarında 3245 evin tikintisini başa vurduğunu, 1847 qəzalı evin tikintisinin davam etdirildiyi haqda açıqlama verib.