Bakıda İƏT ölkələri əmək nazirlərinin görüşü keçiriləcək

Aprelin 23-24-də Bakıda İslam Əməkdaşlıq Təşkilatına (İƏT) üzv ölkələrin əmək nazirliklərinin yüksək səviyyəli rəsmilərinin iclası, aprelin  25-26-da isə əmək nazirlərinin konfransı keçiriləcək. İclasda dünyanın 50-dən çox ölkəsindən nazirlər iştirak edəcəklər.

Konfransda İƏT ölkələri arasında əmək və sosial müdafiə sahəsində əməkdaşlıq üçün möhkəm zəminin yaradılması, bu sahədə mütərəqqi ideya və innovasiyaların təqdimatı və mübadiləsi, habelə İƏT ölkələrində əmək bazarının inkişaf etdirilməsi, əmək potensialının yüksəldilməsi, işçi qüvvəsinin beynəlxalq standartlara çatdırılmasının təmin edilməsi, işsizliyin səviyyəsinin azaldılması və əhalinin rifahının yüksəldilməsidir. 

Görüşün yekunu olaraq iştirakçı ölkələr tərəfindən əmək və məşğulluq məsələləri üzrə “Bakı çərçivə sənədi”nin imzalanması nəzərdə tutulur. Sənəd İslam Konfransı Təşkilatı ölkələri arasında əmək və sosial müdafiə sahəsində gələcək əməkdaşlıq üçün fəaliyyət proqramı kimi qəbul olunacaq. Konfransa ev sahibliyi edən Azərbaycan növbəti 2 il ərzində İƏT üzrə əmək və sosial müdafiə məsələlərinə həsr olunan iclaslara sədrlik edəcək. 

  Qeyd edək ki, 2011-ci il sentyabrın 10-da İstanbulda İƏT üzvü olan ölkələrin əmək nazirlərinin ilk müşavirəsi keçirilib. Həmin müşavirə zamanı növbəti konfransın Bakıda keçirilməsi ilə bağlı təşəbbüs irəli sürülüb.

  İslam Əməkdaşlıq Təşkilatı 1969-cu il sentyabrın 25-də yaradılıb. Müsəlman ölkələrinin ən böyük və  nüfuzlu rəsmi beynəlxalq hökumət təşkilatıdır. Hazırda 1.2 milyard nəfərə yaxın əhalisi olan 56 ölkəni birləşdirir. 08D