Mətbuat-Monitorinq 17.12.13

Rəsmi və iqtidaryönlü qəzetlər dövlət başçısı İlham Əliyevin qəbulları ilə bağlı xəbərləri ilk səhifələrə çıxarıblar. 

“Azadlıq” qəzeti Seçkilərin Monitorinqi və Demokratiyanın Tədrisi Mərkəzinin (SMDT) rəhbəri Anar Məmmədlinin həbsə alınması, ona qarşı qanunsuz sahibkarlıq və vergidən yayınma ittihamı irəli sürülməsini manjetə çıxarıb. 

ARDNŞ-in Anar Əliyev vasitəsilə məxfi neft satışını ifşa edən “Global Witness”ə qarşı neft şirkətinin məhkəmə hədəsinə təşkilat “hesabat dərc olunana qədər SOCAR A.Əliyevin adını dilinə belə gətirmirdi” bəyanatını verib. 

Nazir Kəmaləddin Heydərovun Qax-Balakən zonasında zəlzələdən zərərçəkən vətəndaşları aldatdıqlarına görə nazirliyin 4 əməkdaşı barədə prokuroluğa şikayət etməsini qəzet “zərbəni özündən yayındırmasıl” kimi dəyərləndirir. 

Son 10 ildə ölkədən kənara 17 milyard dollar vəsaitin qanunsuz  çıxarılmasından Mərkəzi Bankın xəbəri olmaması haqda açıqlamasına ekspertlər “bunu ancaq yüksək vəzifəli məmurlar edə bilər” şərhi veriblər.

Azərbaycanda iş adamı kimi tanınan, amma biznesinin mənbəyi məlum olmayan, Fransanın “Lans” klubunun sahibi Hafiz Məmmədov onu amansız tənqidə məruz qoyan fransalı jurnalistləri “killer” adlandırıb. 

Radikal dini qrupların Sumqayıtdakı atışması ilə bağlı daha 4 nəfər həbs edilib və həbs olunanların sayı 10 nəfərə çatıb. 

“Zerkalo” Bakı şəhərinin dünyanın bahalı şəhərləri siyahısına daxil olduğunu yazaraq bu bahalanmaya “əgər bahalanırsa hər yerdə, əgər ucuzlaşırsa təki bizdə yox” mövqeyini ifadə edir. 

“Ekspress” keçmiş “Çeşmə”çi, Mətbuat Şurası NTK-nın üzvü Malik Bayramovun Almaniyadan siyasi sığınacaq istədiyini yazır. 

Ölkədə bir il ərzində mənzillərin qiymətlərinin 26,5% bahalaşdığını yazan qəzet köhnə mənzillərin orta qiymətinin 118 min dollar olduğunu nəzərə çatdırır. 

Qəzet ölkədə qiyməti hökumət tərəfindən tənzimlənməyən Aİ-98 markalı benzinin litrinin 1 manat 50 qəpiyə satıldığını bildirir.  

“Exo”  Azərbaycan vətəndaşlarının dövlətə ödəmədikləri vergilərin həcminin ildə 300 miyon manata çatdığını qeyd edir.  

“Novoe Vremya”  imzalanması bu gün nəzərdə tutulan qaz sazişlərinə “Transadriatik qaz kəməri-Azəörbaycan üçün yeni geosiyasi tələ?” şərhini verir.

“Bizim yol” SMDTM-nin rəhbəri Anar Məmmədlinin həbsə alındığını ilk səhifəyə çıxarıb.

“Yeni Müsavat” Türkiyənin Milli Hərəkat Partiyasının ünlü simalarından Oktay Vuralın hakim Ədalət və Dirçəliş Partiyasını “erməni soyqırımı”nı tanımağa hazırlaşmaqda ittiham etməsini ilk səhifəyə çıxarıb.

“Azərsu”nun rəhbəri  Qorxmaz Hüseynovun qaynı Namiq Cəbrayılovun başçısı olduğu və yaradılan kimi 100 milyon mantlıq layihələrə cəlb edilən “Hidro-Lotus” MMC-nin fəaliyyətini Hesablama Palatası yoxlamağa başlayıb.  

Avrointeqrasiya yolunda Ukraynadan sonra təzyiqlərin Azərbaycana çatacağını bildirən politoloqlar ölkə iqtidarı və müxalifətini “yaxınlaşan yeni situasiyaya indidən hazırlaşmağa” çağırıblar.