Mətbuat-Monitorinq 17.12.14

Rəsmi qəzetlər dövlət başçısı İlham Əliyevin Sabirabad rayonuna səfərinə dair xəbərləri ilk səhifələrdə yerləşdiriblər. Bundan əlavə, dövlət başçısının Sabirabad rayonunun Suqovuşan-Qaralar-Qəfərli-Əhmədabad-Nərimankənd-Həşimaxanlı avtomobil yolunun tikintisi üçün 3 milyon manat vəsaitin ayrılması haqda sərəncamının mətni də bu qəzetlərdə yer alıb.

“Azadlıq” qəzeti Rusiya iqtisadiyyatının çökməsini, hökumətin tədbirlərinə baxmayaraq, rublun sürətlə dəyərdən düşməsinin davam etdiyini manjetə çıxarıb.

Naxçıvanda narkotik maddə ittihamı ilə şərlənərək həbs edilən AXCP fəalı Hicran Qasımovun məhkəməsi başlayır.

“Sərhədsiz Reportyorlar” təşkilatı jurnalist həbsinin çoxluğuna görə Azərbaycanı “Avropanın ən böyük jurnalist həbsxanası” sayır.

Araşdırmaçı-jurnalist X.İsmayılın həbsinə cavab olaraq bir qrup xarici jurnalistin X.İsmayılın araşdırma işini davam etdirəcəklərini və Əliyevlərin biznesinin də bunun arasında olacağı bəyanatını qəzet “Almaniyadan Əliyevə zərbə” hesab edir.   

Demokratik Seçkilər Uğrunda Avropa Platforması Azərbaycanda kütləvi repressiyalara “vətəndaş cəmiyyətinə qarşı repressiyalara son qoyun!” bəyanatını səsləndirib.

Həbsdə olan NİDA-çı İlkin Rüstəmzadə Apellyasiya Məhkəməsi baxışında nəzarətçilərin ona olan qəddarlığına “erməni əsirliyində olan azərbaycanlılara həsəd aparıram” mövqeyini bildirib. 

Bir ildə 2 məhkəmə cəzası alan media qurumunun bağlanması üçün məhkəməyə müraciət olunması haqda KİV haqqında qanuna dəyişikliyin rəsmiləşməsini media ekspertləri “azad mətbuatı susdurmaq yönündə növbəti addım” adlandırıblar.

“Ekspress”  rus rublunun sürətlə dəyərdən düşməsini “rublun qara günü...” kimi önə çəkərək Rusiya fond bazarının “təntənəli şəkildə öldüyünü”  bildirir.

Qəzet bu il dünyanın müxtəlif bölgələrində 128 jurnalsitin öldürülməsini nəzərə çatdırır.

ABŞ və Avropanın demokratiyaya, söz azadlığına riayət olunması tələbini Milli Məclis “bu ad altında başqa ölkələrin işinə qarışmaq” kimi dəyərləndirir.

Qəzetə görə, il ərzində 2 məhkəmə cəzası alan media qurumunun bağlanması üçün məhkəməyə müraciət olunması haqda dəyişikliyin KİV haqqında qanunda rəsmiləşməsi sadəcə “qanunun sətrləşdirilməsi”dir.

“Exo”  ölkədə satılan oyuncaqların psixoloji ekspertizadan keçirilməməsini “oyuncaq olmayan problem” kimi diqqət mərkəzinə çəkib.

Qəzetə görə,  Bakı Baş Polis İdarəsində 9 vəzifəli şəxsin vəzifəsindən azad olunması “təmizləmə” yox, polisin parlament seçkilərinə hazırlığının başlamasıdır.

Qəzet bu ilin 10 ayı ərzində ölkədə 10 min boşanma faktının qeydə alındığını nəzərə çatdırır.

“Novoe Vremya”  rəsmi Bakının Vaşinqtonun tənqid etməsinin arxasında ciddi niyyətin durmamasına təəssüf  hissilə “bunun ancaq söz olması” mövqeyini bildirir.

“Bizim yol”  Milli Məclisdə benzinin qiymətinin aşağı salınması təklifinin səsləndirilməsinin ilk səhifəyə yerləşdirib.

Qəzet rus rublunun dəyərdən düşməsinin Azərbaycanda dollara tələbatın artmasına səbəb olduğunu bildirir.

“Yeni Müsavat” bir ildə iki dəfə məhkəmə cəzası alan media qurumunun bağlanması haqda məhkəməyə müraciət olunması haqda dəyişikliyin qanunda rəsmiləşməsini “iqtidarın mediaya qarşı savaşı” kimi şərh edir.

Beynəlxalq “Amnesty İnternational” təşkilatı həbsdə olan jurnalist Xədicə İsmayılı “vicdan məhbusu” elan edib. Hüquq müdafiəçisi Leyla Yunus təcridxanada kartserə salınmasını “5 ay həbsdə olduğu dövrdə ən dəhşətli məqam” adlandırıb.