AXA MBASK sığorta sahəsinin lideri seçilib

AXA MBASK sığorta şirkəti nailiyyətləri və inkişaf dinamikası nəzərə alınmaqla, “Sığorta sahəsinin lideri” nominasiyasında Azeri Business Award-2014 milli mükafatına layiq görülüb.

Press-relizdə deyilir ki, mükafatın təsisçisi, rəsmi aparıcı nəşr olan Business Time jurnalı milli biznesin yeni imicinin yaradıcıları və iş etikasının yeni standartlarının “mühərriklərini” nümunə göstərib. Mükafat nominantların öz bizneslərini genişləndirməsinə, yerli və beynəlxalq bazarlarda nüfuzunu və rəqabətədavamlılığını artırmasına kömək etmək məqsədi daşıyır.

Təqdimetmə mərasimində mükafatı alan AXA MBASK şirkətinin İdarə Heyətinin sədri Yavuz Ölken bu etibara görə təşəkkür edərək, qurumun yerli sığorta bazarının inkişafına və əhaliyə zamanın tələblərinə cavab verən yüksək keyfiyyətli sığorta xidmətlərinin göstərilməsinə yönəlmiş fəaliyyətini qeyd edib. Şirkət daim iş təcrübəsini, idarəetmə metodlarını, strukturunu və göstərilən xidmətlərin səviyyəsini təkmilləşdirir və üzərinə götürdüyü sığorta öhdəliklərini tam həcmdə yerinə yetirir, habelə maliyyə sabitliyi və rəqabət üstünlüyü nümayiş etdirir.

Qlobal Sığorta Qrupunun bir hissəsi olan AXA MBASK sığorta şirkəti 2010-cu ildən etibarən şirkətin mövcud biznes prosedurlarına beynəlxalq AXA standartlarının tətbiqinə başlayıb. Belə ki, sığorta agentlikləri şəbəkəsi vasitəsilə satışın inkişafı planını həyata keçirən şirkət qısa müddət ərzində bütün Azərbaycan ərazisində fiziki və hüquqi şəxslərlə, habelə maliyyə-kredit müəssisələri ilə bütün sığorta növləri üzrə işə yönəlmiş 80-dən çox sığorta polisi satışı məntəqəsi açıb.

Qeyd etmək lazımdır ki, bu, şirkətin bazara çıxdığı andan etibarən aldığı 7-ci mükafatdır. Belə ki, yuxarıda qeyd edilən mükafatdan başqa, AXA MBASK “Xidmətlərin yüksək keyfiyyətinə görə ilin şirkəti” nominasiyasında Caspian Energy Integration Award-2014 mükafatını, habelə “İlin sığorta şirkəti” nominasiyasında Caspian Energy Integration Award (2013 və 2011) beynəlxalq mükafatlarını alıb.

Bu mükafatlarla yanaşı, AXA MBASK “İlin sığorta şirkəti” nominasiyasında Azeri Business Award-2013 mükafatına və “Beynəlxalq sığorta təcrübəsinin Azərbaycan bazarında tətbiqinə töhfə” (2010) və “İlin sığorta şirkəti” (2012) nominasiyalarında UĞUR milli mükafatına layiq görülüb. -17D-