Mətbuat-Monitorinq 18-19.05.14

Rəsmi qəzetlər dövlət başçısı İlham Əliyevin Mingəçevir şəhərinin sosial iqtisadi inkişafı ilə bağlı bu şəhərə 3 milyon manat pulun ayrılması haqda sərəncamın, bəzi qanunların tətbiqilə bağlı imzaladığı sənədlərin mətnlərini ilk səhifələrdə yerləşdiriblər.  

“Azadlıq” qəzeti  Əliyev rejiminin böyük seçim qarşısında qaldlığını ilk səhifəyə çəkərək “Əliyev Avropaya inteqrasiyanı seçəcəkmi?” sualını gündəmə gətirir.

ABŞ-ın Azərbaycan səfiri “Azadlıq” radiosuna müsahibəsində rəsmi Bakını tənqid etdiyinə görə iqtidarın qarşılıqlı tənqidlərinə məruz qalıb.

Qəzet qeyd edir ki, son vaxtlar rejimin təzyiqlərinə məruz qalan hüquq müdafiəçisi Leyla Yunusla bağlı Fransanın “Le Monde” qəzeti “Əliyev klanı ilə mübarizə aparan qadın” sərlövhəli məqalə dərc edib.

Qəzet yazır ki, ermənilərin işğal etdikləri ərazilərin Azərbaycana qaytarılmalı olması haqda açıqlamasına görə ATƏT-in Minsk Qrupunun ABŞ-dan olan həmsədri Uorlik Qarabağda erməni gənclərin təzyiqlərinə məruz qalıb.

ABŞ-ın Azərbaycan səfiri Morninqstarın müsahibəsində Qərbə və Rusiyaya münasibətdə rəsmi Bakının monolit olmaması mövqeyini ifadə etməsini YAP-çılar “Azadlıq” radiosunun səfiri təxribata çəkməsi” kimi dəyərləndiriblər.

Bakının tarixi “sovetski” məhəlləsinin sökülməsinə şərh verən ekspertlərə görə əsas məqsəd oliqarxların buradakı tarixi binaları ələ keçirmək istəmələridir.

Rəsmi Bakının təzyiqlərinə məruz qalan hüquq müdafiəçisi  Mətanət Əzizlinin anası Mirvari Qəhrəmanlının insult keçirdiyini yazan qəzet onun xəstəxanada yatmaqdan imtina etdiyini bildirir.

Eks-spiker Rəsul Quliyev onu Azərbaycanda korrupsiyanın “banisi” sayan PA-nın şöbə müdiri  Novruz Məmmədovu “çoban Xanış səviyyəli adam” adlandırıb.

“Yeni Müsavat” Rusiya ilə Qərb arasında başlanan “soyuq müharibə” ilə bağlı Azərbaycanın durumunu “od ilə su arasında qalması” kimi dəyərləndirir. 

ABŞ-ın Azərbaycan səfiri Morninqstarın müsahibəsində rəsmi Bakının tənqidinə cavab verənləri qəzet “rus generalları” adlandırır, bu müsahibəsilə səfirin “rus nəğmələri oxuyanlara da” mesaj verdiyi nəzərə çatdırılır.

Qəzetin iddiasına görə, sentyabr ayında kadr dəyişikliklərinin yeni dalğası gözlənilir.

AŞPA-nın Azərbaycan üzrə həmməruzəçilərinin Bakıya bugünkü səfərində söz, mətbuat azadlığının durumunun müzakirə olunacağını yazan qəzet müxalif qüvvələrin bu görüşlərdən müsbət heçnə gözləmədiyini nəzərə çatdırır. 

Qəzet yay mövsümü hələ başlamamış Bakı bulvarında qiymətlərin artdığını, bir şiş kababın 7 manat, bir çaydan çayın 15 manat olduğunu yazır.

Hərbi ekspertlər son vaxtlar ordudakı kadr dəyişikliklərini Baş Qərargah rəisi Nəcməddin Sadıqovun adamlarının vəzifəyə gətirilməsi kimi şərh edirlər.