Mətbuat-Monitorinq 18.04.14

Rəsmi qəzetlər dövlət başçısı İlham Əliyevin qəbulları, pravoslav xrisitan icmasına təbriki, paytaxtda tikilən Su İdmanı Sarayının tikintisilə maraqlanması barədə  xəbərləri ilk səhifələrə çıxarıblar.

“Azadlıq” qəzeti mühakiməsi başa çatan bir qrup “NİDA”çı gəncə dövlət ittihamçısının üst-üstə 63 il həbs cəzası istəməsi tələbini ilk səhifəyə çıxarıb.

Qəzet yazır ki, AŞ nazirlərinin müavinləri 2014-15-ci illərdə Azərbaycanda insan haqları, qanunun aliliyi və demokratiyanın dərinləşdirilməsi  üzrə tədbirlər planını təsdiqləyiblər.

Qəzetin kollektivi satışından əldə edilən maliyyə vəsaitlərini “Qasid” yayım firmasından ala bilmədiyi üçün bu gün firmanın önündə aksiya keçirməyi nəzərdə tutur.

“Facebook” şəbəkəsində “Yaltaqlara dur deyək!” səhifəsinin admini, narkotik maddə ilə şərlənərək həbs edilən Əbdül Əbilovun işi üzrə məhkəmə prosesi başlayıb.

Rəsmi Bakıya yaxın KİV-lərin ABŞ-ı Azərbaycanda inqilab hazırlamaqda ittiham etmələrini qəzet münasibətləri hakimiyyətin korlaması” adlandırır.

Neft sənayesindəki ixtisarlara toxunan hüquq müdafiəçiləri bu ixtisarların 20 min insanı işsiz qoyacağını bəyan edirlər.

“Zerkalo” hazırda ölkədə 612 mindən çox ailənin ünvanlı sosial yardım alması statistikasını önə çəkib.

“Exo” Bakıda yerüstü maşın dayanaclarının ləğv olunması nəticəsində yeraltı dayanacaqların gəlirlərinin 7 milyon manata qalxacağını nəzərə çatdırır.

“Novoe Vremya” Azərbaycanın Avropa Şurası Nazirlər Kabinetinə sədrliyini Şuranın “demokratikləşməni dəstəkləməsi əvəzinə imitasiyanı dəstəkləməsi” sayaraq “Azərbaycanda hansısa insan haqları haqda danışmaq olarmı?” sualını gündəmə gətirir.

Qəzet ekspertlərə istinadən ölkədə ilkin mənzil bazarının fevralla müqayisədə mart ayında 2% bahalandığını, Bakı mərkəzində mənzilin kv.metrinin 3 min manatdan 40 min manatadək təşkil etdiyini bildirir.

“Bizim yol”  dövlət ittihamçısının mühakiməsi başa çatan “NİDA”çı gənclərə üst-üstə 64 il həbs cəzası istəməsini ilk səhifəyə çəkib.

Dini ekspert Elşad Miri qəzetə açıqlamasında ölkədəki dini anlaşılmazlıqları Qafqaz Müsəlmanları İdarəsinin yaratması kimi bəyanat səsləndirib. 

Qəzet Ağdaş Rayon Sosial Müdafiə Mərkəzinin müdiri Vahid Seyfəlovun vətəndaşlara çatacaq 2 milyon manat vəsaiti mənimsədiyinə görə həbsə alındığını nəzərə çatdırır.

Rabitə naziri Əli Abbasov mobil opreatorlara qiymətləri aşağı salmadıqları halda məcburi tədbirlər görəcəyi barədə xəbərdarlıq edib.

“Yeni Müsavat” dövlət ittihamçısının “NİDA”çı gənclərə həbs cəzası istəməsi, buna etiraz olaraq gənclərin aclıq aksiyasına başlayacaqları xəbərini manjetə çıxarıb.

Qəzet Rusiyanın Ukraynadan sonra Pribaltika və Azərbaycana hücum edəcəyi barədə Rusiyada partiya sədri Jirinovskinin bəyanatını “Kremlin qorxunc minimum və maksimum planı” kimi dəyərləndirir.

Son vaxtlar ölkədə “nurçu”lara qarşı təqiblərə toxunan qəzet məmurların daxilində bu təqiblərin qurbanı ola bilmək təşvişi yarandığını iddia edir.

Lerik rayon sakinləri rayon icra başçısının qardaşına məxsus “Cavanşir” MMC-nin 7 ildə 4 milyon manatı mənimsədiyini nəzərə çatdırırlar.