Mətbuat-Monitorinq 18.06.14

Rəsmi qəzetlər dövlət başçısı İlham Əliyevin Yunanıstan səfəri və görüşləri ilə  bağlı yazıları ilk səhifələrə yerləşdiriblər.

“Azadlıq” qəzeti NATO-nun Bakı seminarında Azərbaycan rəsmilərinin ABŞ-a hücumlarını tədbirdə anti-Rusiya ovqatının yaranmasına rəsmi Bakının “kontur tədbirləri” sayaraq manjetə çıxarıb.

Brüsseldə keçirilən Vətəndaş Cəmiyyəti Forumu siyasi məhbus Anar Məmmədlini Vaslav Qavrl mükafatına nominasiya edib.   

ABŞ səfiri R. Morninqstar ölkə mətbuatında yer alan MDİ-nin Bakı nümayəndəliyinə qarşı irəli sürülən cinayət ittihamlarını cəfəngiyyat adlandırıb.

Qəzet aparılan təhlillər əsasında Azərbaycanın Konstitusiyasına görə respublika, əslində isə monarxiya kimi idarə edilən ölkənin dünyadakı cəmi 18 belə dövlət sırasında yer aldığını nəzərə çatdırır.

Dövlət başçısı İlham Əliyevin ölkədə müxalifət qüvvələrini daim əzdiyini yazan qəzet onun Yunanıstanda müxalifət partiyasının lideri Aleksis Tsipras ilə görüşünü “adamı çaşbaş salan addim, əsrin paradoksu” adlandırır.  

“Ekspress”  NATO PA-nın Bakıdakı tədbirinə erməni deputatların qatılmasına etiraz olaraq Qarabağ Azadlıq Təşkilatının tədbir keçirilən məkanın önündə “Erməni faşistləri rədd olsun!” şüarı ilə aksiya keçirdiyini yazır.

“Exo”  RF xarici işlər naziri Sergey Lavrovun Azərbaycan səfərinə toxunaraq ekspertlərə istinadən əsas müzakirə obyektinin Azərbaycanın Avrasiya İqtisadi ittifaqına daxil olması yox, Qarabağ müzakirəsinin olacağını iddia edir.

“Novoe Vremya”  İraqda “İraq Şam İslam Dövləti” adlı terror qruplaşmasının işğal edəcəyi ərazilər sırasına Azərbaycanı da daxil etməsinə “vəhabilik Azərbaycan üçün ciddi təhlükəyə dönür” reaksiyasını sərgiləyir. 

“Bizim yol”  Suriyada Əsəd rejiminə qarşı vuruşmuş və Azərbaycana qayıtmış 5 azərbaycanlının həbsə alınmasını ilk səhifəyə çıxarıb.

Qəzet Bakıda bank hesablarını talayan dəstənin xüsusi xidmət orqanları tərəfindən ələ keçirildyini bildirir.

Ölkədaxili və beynəlxalq turpaketlərin qiymətlərinin ötən illə müqayisədə xeyli bahalaşdığını yazan qəzet fakta “bu yay turistləri “yandıracaq” mövqeyini ifadə edir.

“Yeni Müsavat”  nazir Yavər Camalovun Türkan kəndinin Xəzər dənizi sahillərinə çıxan hissəsini kəsməsini önə çəkərək  faktı “Yavər Camalovun Xəzərə darvaza qoyması” kimi dəyərləndirir.

Qəzet “Azərenerji” birliyinin rəhbəri Etibar Pirverdiyevin Zirə kəndində dəniz sahillərinə çıxan hissəni hasarladığını, kənd sakinlərinin rəsmi qurumlara şikayət etdiklərini yazır.

“London taksiləri”nin sürücülərinin kütləvi şəkildə işdən çıxdıqlarını yazan qəzetə bu faktın “Bakı Taksi” MMC-ni çətin duruma saldığını, taksi sürücüləri cəlb edə bilmək üçün elanların yayıldığını nəzərə çatdırır.

“Mandat rüşvəti” qalmaqalına görə həbsxana həyatı yaşamış, bu ilin mayında şərti azadlığa buraxılmış keçmiş deputat Gülər Əhmədova sahibi olduğu “Mərkəz” qəzetinin fəaliyyətini bərpa edir və artıq heyət yığmağa başlayıb.