Mətbuat-Monitorinq 18.07.13

Rəsmi və iqtidaryönlü qəzetlər dövlət başçısı İlham Əliyevin rəsmi qəbulları haqda yazırlar. Bundan əlavə, bu qəzetlərdə dövlət başçısının Göyçay rayonunun sosial inkişafı üçün 2,2 milyon manatın ayrılması haqda sərəncamının mətni də yer alıb. 

Bu qəzetlər Milli Şuranı xaricdə dəstək axtarışında ittihama məruz qoyublar, Milli Şura rəhbərliyi xalqı satmaqda suçlanır.  

“Azadlıq” nəqliyyat naziri Ziya Məmmədovun oğlu Anar Məmmədovun Bodrumda 40 milyon dollara ada alması, türk cangüdəninin güllələnməsi xəbərini manjetə çəkib. 

Bakıda mövcud olan yarım milyon sənədsiz tikilinin taleyilə bağlı şəhər meriyasındakı müzakirələrdə bəzi icra başçıları evlərin leqallaşdırılması haqda dövlət başçısının tapşırığının olmasına baxmayaraq onların sökülməsini təklif edib. 

Keçmiş deputat Gültəkin Hacıbəylinin baldızı Mahirə Mehdiyeva insan əməyini istismara görə DİN tərərfindən saxlansa da sonradan sərbəst buraxılıb. Bəzi ekspertlərə görə, bu sərbəst buraxılma keçmiş deputata hansısa ləkə atmaq barədə razılaşdırılmış addım da ola bilər. 

Milli Şuranın prezidentliyə vahid namizədi Rüstəm İbrahimbəyovun iyulun sonunda Bakıya gələcəyi, elə Rusiya vətəndaşlığından çıxarılması məsələsinə də həmin vaxt baxılacağı qeyd edilir. 

“Zerkalo” ABŞ-da Azərbaycanla bağlı dinləmələri əsas xəbər yerinə çəkib.

“Ekspress” Azərbaycanın adının Rusiyadan ən çox silah alan ilk 5 ölkə arasında olmasını ilk səhifəyə çıxarıb. 

“Novoe Vremya” ABŞ-da Azərbaycanla bağlı dinləmələrə iqtidarın “brifinq” adı verərək əhəmiyyətini azaltmaq istəməsinə “necə istəyirsiz adlandırın, bu, mahiyyəti dəyişmir” şərhini verib.

“Bizim yol” prokurorun “Texnikabank” əməkdaşlarına üst- üstə 223 il cəza istəməsini ön səhifəyə çıxarıb.

Nəsimi Rayon Məhkəməsi “İntur-avto” ASC-nin Bakı meriyasına qarşı mülkiyyət hüququnun qorunması haqda 17 milyon manatlıq iddiasına baxıb və  iddianı qismən təmin edərək meriyanı 4 milyon 700 min manat cərimələyib. 

“Yeni Müsavat” ABŞ Konqresində Azərbaycanla bağlı dinləmələrə “ABŞ-da iqtidar əleyhinə sərt müzakirələr” şərhini verərək ilk plana çıxarıb. 

Türkiyənin “Hürriyyət” qəzeti nazir Ziya Məmmədovun oğlu Anar Məmmədovun 40 milyona ada almasına diqqət çəkir. 

İqtidar əleyhinə çağırış olan “susma” klipinə görə Vergilər Nazirliyinin vergidən yayınma adı ilə istintaqa cəlb edilən Hüseyn Abdullayevin vəkili bu vergilərin ödənməsi və bu ödəmə haqda qəbzlərin surətlərini mətbuata təqdim edib. 

Mingəçevir şəhər polis rəisi Zərdab rayon icra başçısı Lütfəli Babayevin qardaşı oğlunu avtoxuliqanlığa görə saxlayıb. İcra başçısı polisi təhqir edib, polis də “o, yaxşı icra başçısı olasaydı Mingəçevirdən Zərdaba atmazdılar” mövqeyini ifadə edib. 

Türkiyəli milyarder, tikinti maqnatı Əli Ağaoğlu Bakı metrosunun “Sahil” stansiyası yaxınlığında iqamətgahının tikintisnə başlayıb.