Mətbuat-Monitorinq 18.07.14

Rəsmi qəzetlər dövlət başçısı İlham Əliyevin QMİ sədri, şeyxülislam Allahşükür Paşazadənin Ramazan ayı münasibətilə verdiyi iftar mərasimində iştirak etməsi haqda xəbərə geniş yer veriblər.

“Azadlıq” qəzeti həbsdə olan Hərbi Dəniz Qüvvələrinin keçmiş komandanı Şahin Sultanovun hərbi prokuror Xanlar Vəliyev və müdafiə naziri Zakir Həsənovu ittiham edən  məktub yazmasını ön səhifəyə çəkib.

Korrupsiyaya Qarşı Mübarizə İdarəsinin rəisi Kamran Əliyevin məmurlar barədə mətbuatda gedən yazıların araşdırılacağını bildirməsini qəzet “hökumətin qara siyahısında olan məmurların media vasitəsilə vurulması” kimi şərh edir.

ABŞ Konqresinin Obamaya Azərbaycanla hərbi əməkdaşlığı gücləndirmək tövsiyəsi verdiyini yazan qəzet bunu ABŞ-ın Azərbaycanın təhlükəsizliyini təmin edəcəyi kimi dəyərləndirir.

Böyük Britaniyanın Avropa işləri üzrə naziri Devid Lidinqton QHT rəhbəri Həsən Hüseynlinin həbsini pisləyən bəyanatla çıxış edib.

Baş nazirin keçmiş müavini  Abbas Abbasova son zamanlar şiddətlənən hücumlara toxunan qəzetə görə, bu, rəsmi Bakının A.Abbasovdan zərbə gözləməsilə  bağlıdır.

PA-nın şöbə müdiri Novruz Məmmədov Azərbaycanı tənqidə görə İsveçrə xarici işlər nazirini Azərbaycana təzyiq göstərməkdə və “tutuquşu kimi bir neçə sözü əzbərləyərək çıxış etməkdə” suçlayıb.

Qəzet mal-qara arasında mənşəyi məlim olmayan xəstəliyin yayıldığına görə Ucar, Biləsuvar, Cəlilabad və Ağdaş rayonlarında mal bazarlarının bağlandığını bildirir.

“Ekspress”  PA-nın şöbə müdiri Novruz Məmmədovun İsveçrə xarici işlər nazirini tutuquşuya bənzətməsini və “dünyanı bu günə İsveçin XİN başçısı kimi şəxslərin salması” mövqeyini ilk səhifədə yerləşdirib.

Məhkəmə-Hüquq Şurasının iki hakimin fəaliyyətinə xitam verildiyini, daha ikisinə irad bildirildiyini, 6 hakimin barəsində intizam icraatının başladığını nəzərə çatdırır. 

Qəzet son 13 ildə “Azəri-Çıraq-Günəşli” (AÇG) neft-qaz yataqları blokundan Neft Fonduna 102 milyard dollar vəsaitin daxil olduğunu qeyd edir.

“Exo” ölkədə 182 min ailənin ünvanlı sosial yardım almasını ilk səhifəyə çıxarıb.

Qəzet ilin əvvəlindən bu yana ölkə yollarında baş verən 1234 yol-nəqliyyat qəzasında 500 nəfərin həlak oduğunu, bu qəzaların 444-ün Bakıda törədildiyini nəzərə çatdırır. 

“Novoe Vremya” ABŞ-da rəsmi Vaşiqntonun rəsmi Bakı ilə hərbi əməkdaşlığı artırmaqda maraqlı olması haqda suallara “Vaşinqtondan hansı müdafiəni gözləmək olar” sualını gündəmə gətirməsini vacib sayıb. 

“Bizim yol” vəhabilərə dəstək verməkdə ittiham edilən “Liman” şirkətinin “Suriyada döyüşüb gələn heç bir döyüşçünün klinikada qəbul olunmadığı” haqda açıqlamasına diqqət çəkir.

Kəlbəcərdə girov götürülən azərbaycanlılarla bağlı BMM-də keçirilən tədbirdə öncə mikrafon, sonra işıqlar söndürülüb, konfrans zalının təmirə bağlandığı elan edilib.

“Yeni Müsavat”  Ərdoğanın prezident seçiləndən sonra Ermənistanla sərhədlərin açılması məsələsinin gündəmə gəlməsini ilk plana çəkərək bunu “Ərdoğandan Bakıya Qarabağ şantajı” adlandırır. 

QHT haqqında qanuna son dəyişikliklərdən sonra bu qurumların hesablarına pul yatırılmasının problemə döndüyünü deyən ekspertlər buna görə QHT-lərin banklar üçün arzolunmaz müştəriyə döndüklərini nəzərə çatdırırlar.

Qəzet qeyd edir ki, “Yüksel” firmasına aid restoranı sökdürən Bakı meri Hacıbala Abutalıbov firma sahiblərinə kompensasiyanı ödəmək istəmir.

Təhsil üzrə ekspetlər TQDK-nın keçid ballarını aşağı salmasını  “birbaşa təhsilin səviyyəsi” və “abituriyentlərin aşağı nəticə göstərməsi” ilə əlaqələndirirlər.