Mətbuat-Monitorinq 19.04.13

Rəsmi və hökumətyönlü qəzetlər dövlət başçısı İlham Əliyevin Dövlət Musiqili Teatrının bərpa işlərindən sonra açılışında iştirakı, Mingəçevir şəhərinin sosial-iqtisadi inkişafı (5 milyon manat), şəhər xəstəxanasının təmiri (3 milyon manat) və çimərliklərin bərpası (2 milyon manat) üçün üst-üstə 10 miyon manat vəsait ayrılması haqda sərəncamlarının mətnlərini dərc ediblər.

Bu qəzetlər aparıcı müxalifət qüvvələrinə, tanınmış ziyalılara qarşı  təhqir və böhtana dolu yazılar dərc ediblər.  

“Azadlıq” qəzeti dövlət başçısı İlham Əliyevin PA rəhbəri Ramiz Mehdiyevi “Şərəf” ordenilə təltif etməsini “Paşayevləri məyus etməsi” adlandıraraq manjetə çıxarıb .

Qəzet İlham Əliyevin atası, mərhum dövlət başçısı Heydər Əliyevə həsr edilən növbəti “gül bayramı” ilə bağlı orta məktəb şagirdlərindən pul yığılmasına başlandığını bildirir. 

YAP-ın “vuran əli” Siyavuş Novruzov Azərbaycanın seçki sistemini tənqid edən ABŞ dövlət katibinin müşaviri T.Melianın şəxsində rəsmi Vaşinqtona “gedib öz işilə məşğul olmağı “tövsiyə edib”. 

“Ekspress”. Daim dünyada sürətli inkişaf etməkdən danışan rəsmi Bakı Ümumdünya Ticarət Təşkilatına üzv olmamasına “rəqabətə hələ hazır deyilik” kimi cavab verib.  

Güney Azərbaycan Hərəkatı rəsmi Tehranın Azərbaycanı İran vətəndaşlarına “dinsiz və əxlaqsız ölkə” kimi tanıtmağa çalışdığı barədə açıqlama yayıb. 

“Exo” vətəndaş cəmiyyəti institutları təmsilçilərinə istinadən ölkədə mənzil tikinti şirkətlərinin aldatdıqları 16 min nəfərdən çox vətəndaş yaşadığını və bunların sayının artmaqda olduğunu bildirir.

“Novoe Vremya” ABŞ dövlət katibinin müşaviri Tomas Meilanın İlham Əliyevin üçüncü dəfə prezidentliyə namizəd olmasını “qırmızı xəttin keçilməsi” saymasına, sonra isə sözünü geri götürməsinə “qırmızı xətt”in müvəqqəti olaraq... çəhrayı rənglə boyanması” şərhini verib.

Milli ordu sıralarında qeyri-döyüş itkilərinin artmasına qəzet “hərc-mərcliyə görə kim cavab verəcək?” sualını gündəmə gətirir.

“Bizim yol”. Rusiya universitetlərinə qəbul adı ilə 400 vətəndaşı aldadan “İNFO-RTM”  və “İnnovasiya” MMC-nin barəsində cinayət işi qaldırılıb. 

“Yeni Müsavat” Rabitə Nazirliyinin məlumat bankından oğurlanan informasiyalar sırasında dövlət qurumlarının terrorçu qurumlara pul ötürən Ukrayna şirkəti ilə işləməsinə iddiaların olduğunu nəzərə çatdırır. 

İnhisarçıların gömrük rüsumlarından azad edilməsini nəzərdə tutan “Gömrük tarifi haqqında” yeni qanun layihəsini qəzet “inhisarçılara yaşıl işıq” adlandırır.

Rusiya Federasiyasının İctimai Palatası “erməni soyqırımı”nı inkar edənlərə cəza qanunu nəzərdə tutan qanun layihəsi hazırlayır. 

Qazax rayon sakinləri Səməd Vurğunu təhqirə görə ADP sədri Sərdar Cəlaloğludan üzr istəməsini tələb edirlər.