Mətbuat-Monitorinq 20-21.01.13

“Azadlıq” qəzeti ticarət mərkəzində minlərlə sahibkarın hüquqları uğrunda mübarizəyə qalxdıqlarını, polisin aksiyanı qəddarlıqla dağıtdığını, yüzlərlə insanın həbsə alındığını, xarici medianın bu haqda yazdığını bildirərək aksiyanı “Binədə sahibkarların üsyanı” kimi dəyərləndirir. AXCP sədri Əli Kərimli isə aksiya iştirakçılarına tutulan divana “iqtidarın ərəb inqilablarından nəticə çıxarmaması” qənaətini ifadə edib. 

Qəzet tanınmış ziyalı və ictimai xadim Rüstəm İbrahimbəyova və ətrafına təzyiqlərin davam etdiyini, təzyiqlərin nəticəsi olaraq aktyor Rasim Balayevin R.İbrahimbəyovu tərk etdiyini, onun Şamaxıda evi olmasından “qara piar”ın hazırlandığını yazır. 

Hüquq müdafiəçisi Leyla Yunus qəzetə açıqlamasında Azərbaycanın avropalı deputatları ələ almaları ilə bağlı AŞPA-da rüşvət alan deputatların səlahiyyətlətinin dayandırılması qaydalarının tətbiq oluna biləcəyini söyləyib.  

Ölkədə korrupsiyanın səviyyəsinə görə dövlət başçısı İlham Əliyevi “ilin adamı” seçən Mütəşəkkil Cinayətkarlıq və Korrupsiya Hesabatı Layihəsinə çoxsaylı etiraz məktublarının göndərilməsini qəzet “Əliyevin beynəlxalq təşkilata qarşı kampaniya aparması” adlandırır. 

Qəzet Bakıda kriminal aləm təmsilçilərinin nüfuz dairələrinin bölüşdürülməsi ilə bağlı toplantısının dağıdıldığını, 11 nəfərin saxlandığını yazır. 

Ekspertlər iqtidarın beynəlxalq qurumlarla qarşıdurmasına “seçki yaxınlaşdıqca daha sərt təzyiqlərlə üz-üzə qalacağı” şərhini veriblər.

“Yeni Müsavat” nazir Kəmaləddin Heydərovun tanınmış QHT rəhbərinə iqtidar və müxalifətin prezidentliyə namizədlərinə real alternativ olmaq, “yeni namizədin” müxalifəti parçalamaq, yekunda iqtidarın namizədini qələbəyə görə təbrik etmək layihəsi hazırladığını iddia edir. 

12 yanvar aksiyasında iştiraka görə cərimə cəzası alan gənclərin cərimələrini ödəmək üçün başlayan “5 qəpik” kampaniyasında 10 min manat toplanıb.

Politoloq Eldar Namazov ölkədə ictimai hərəkatın kütləviliyini təmin etmək üçün “susan çoxluq elektorarı”nı hərəkətə gətirmək üzərində iş getdiyini söyləyib. 

Yanvarın 13-də Lənkəranda Müsavat Partiyasının başqanına və nümayəndə heyətinə qarşı cinayət araşdırılmır.  

Hüquq müdafiəçiləri “Binə” ticarət mərkəzində bir qrup sahibkarın iqtisadi hüquqlarını müdafiə etdikləri üçün polis qəddarlığına məruz qalmalarını Avropa Şurasında qaldıracaqlarını bəyan ediblər.   

“Bakı Xəbər” qəzetinə şərh verən vətəndaş cəmiyyəi institutlarının təmsilçiləri Binə ticarət mərkəzində hüquqlarının müdafiəsilə bağlı etiraz aksiyası keçirən sahibkarları polisə aqressiv münasibət göstərməkdə ittiham edir, amma polisin qəddarlığı haqda yazmır.