Rəsmi və iqtidaryönlü qəzetlər dövlət başçısı İlham Əliyevin Belçikaya işgüzar səfərə yola düşməsi haqda yazırlar. Budan əlavə, Suraxanı rayonunun sosial inkişafı üçün 2 milyon manat vəsaitin ayrılması haqda sərəncamın mətni də bu qəzetlərdə yer alıb.
Bununla yanaşı bu qəzetlər ölkənin etiraz elektoratını ətrafında birləşdirən Milli Şura ilə bağlı yalan, böhtan və iftira səpgili yazıları davam etdirirlər.
“Azadlıq”. Prezident Administrasiyasının İşlər İdarəsinin keçmiş müdiri Akif Muradverdiyevin 18 min manatı bəyannamədə göstərmədən xaricə çıxarması adı ilə barəsində həbs qətimkan tədbiri seçilib.
Avropa Parlamentində Azərbaycanda insan haqlarının durumu ilə bağlı dinləmələr keçirilməsini qəzet “Əliyev üçün “sürpriz müzakirə” adlandırır.
Offşor zonalardakı şirkətlər vergilərdən yayındıqları üçün bu zonaların Qərb tərəfindən ləğv ediləcəyini deyən ekspertlər buradakı maliyyə vəsaitlərinin batacağı barədə xəbərdarlıq edirlər.
Polkovnik İsa Sadıqov Rəsmi Bakının onun barəsində “cinayət işi” şantajına başlamasına cavab olaraq “Bakıya gəlmək fikrindən daşınmadığını və Bakıdakı quldur rejimin üzvlərini damlamağa gələcəyini” bəyan edib.
Müxalif siyasilər rəsmi Bakının ölkə boyu repressiyalara start verməsinə “iqtidar qorxudan repressiyaya əl atıb” şərhini veriblər.
“Zerkalo” rəsmi Bakının siyasi mühacir, polkovnik İsa Sadıqova qarşı başladığı cinayət işini “siyasi motivli addım” adlandırır.
Sumqayıt şəhəri dünyanın yaşanılması mümkün olmayan 8 şəhəri sırasında yer alıb.
“Ekspress”. Demokratik Qüvvələrin Milli Məclisinin üzvü Eldəniz Quliyev qəzetə açıqlamasında qurumun 28 iyunda keçiriləcək iclasında vahid namizəd məsələsinin həll olunacağı anonsunu verib.
“Exo” ölkədə ikili vətəndaşlıq haqda qanunun olmamasına baxmayaraq, ekspertlərə istinadən Azərbaycanın 1 milyon vətəndaşının ikili vətəndaşlığa malik olduğunu yazır.
“Novoe Vremya” yazır ki, AXCP sədri Əli Kərimli keçirdiyi mətbuat konfransında güc strukturlarını “iqtidarın repressiya aləti” adlandırıb.
“Bizim yol” dövlət çevrilişi cəhdi adı ilə 2005-ci ildə həbs olunan və sonra azadlığa çıxan Prezident Administrasiyasının İşlər Idarəsinin keçmiş müdiri Akif Muradverdiyevin qaçaqmalçılıq ittihamı ilə yenidən həbsə alındığını yazır.
“Yeni Müsavat” ölkənin protest elektoratını əhaətə edən Milli Şuranın sədri Rüstəm İbrahimbəyovun Milli Etimad hökuməti qurmağa başlaması xəbərini ilk səhifəyə çıxarıb.
Siyasi mühacir, polkovnik İsa Sadıqova qarşı rəsmi Bakının cinayət işi başlamasına Milli Şuranın icra aparatının rəhbəri Eldar Namazov “kiməsə xox gəlməklə siyasi prosesin qarşısını almaq mümkün deyil” cavabını verib.
Qəzet Əmlak Komitəsinin sədri Kərəm Həsənova məxsus 12 mərtəbəli “Dalğa Palace”ın həmin ərazidə yeni fontan salınması ilə bağlı söküləcəyini yazır.
Rəy yaz