Mətbuat-Monitorinq 21.06.14

Rəsmi qəzetlər dövlət başçısı İlham Əliyevin “Ölkənin ərazi bütövlüyü, müstəqilliyi, Konstitusiya quruluşunun müdafiəsi zamanı əlil olan şəxslərin və şəhid ailələrinin sosial-məişət şəraitinin yaxışılaşdırılmasına dair əlavə tədbirlər haqqında” sərəncamının mətnini dərc ediblər.  

“Azadlıq” qəzeti ATƏT-in Bakıda keçirilməsi gözlənilən toplantısında RF əleyhinə qətnamə qəbulunun planlaşdırılması xəbərini önə çəkərək, bunu “ABŞ-da Əliyevləri təşvişə salan qərar” adlandırır.

Rəsmi Bakının son aylarda siyasi fəallara, jurnalist və hüquq müdafiəçilərinə hədsiz təzyiqlərini yada salan qəzet durumun AŞPA sessiyasında müzakirə olunacağını qeyd edir. 

“Sərhədsiz Reportyorlar” Azərbaycanda müstəqil rnətbuatın məhv olduğunu bəyan edərək, nümunə kimi “Zerkalo” qəzetinin bağlanmasını göstərir. 

Hüquq müdafiəçisi Leyla Yunus rəsmi Bakının ona olan hücumlarına “mən hücuma keçəndə iqtidarın itkiləri daha çox olacaq” cavabı verib.

Deputat Qüdrət Həsənquliyevin “RF ilə anlaşma olsa Qarabağın bir həftəyə Azərbaycana qaytarıla bilməsi” bəyanatını qəzet “rusmeyllilərdən növbəti jest” adlandırır.

Orduda əsgər ölümlərinin yenidən artdığını yazan qəzet ekspertlərin belə davam edərsə 2014-cü ildə əsgər ölümlərinin rekord həddə çatacağı rəyini yazır.

Son vaxtlar Qərb və Rusiya rəsmilərinin Azərbaycana sıxlaşan səfərlərini ekspertlər “Böyük güclərin Azərbaycan savaşının başlaması” adlandırırlar.

“Ekspress” qəzeti ordu sıralarında bir əsgərin əvvəlcə 2 əsgər yoldaşını, daha sonra özünü öldürməsi xəbərini “orduda müsibət” adı ilə ilk plana çəkib. 

“Novoe Vremya” qəzeti ABŞ-ın “DQ” separatçılarına yardım ayırmasına etirazını “okeandan o yandakı “tərəfdaşlar”, siz kiminləsiniz? ” sualı ilə ifadə edir.

Ölkənin turizm və istirahət mərkzələrindəki durumu təhlil edən qəzet buna “Azərbaycanda istirahət: baha və keyfiyyətsiz” qiyməti verir.

“Bizim yol” qəzeti Bakı aeroportunda saxlanılan gürcü deputatların üzərindən gömrükdə qeydə düşməyən 1 milyon dollar pul çıxması xəbərini önə verib.

Qəzet ATƏT-in Bakı toplantısında Kremli ittiham edən layihə ilə çıxış edəcəyini yazaraq, bunu “ABŞ-RF döyüşü” adlandırır.

Azərbaycanda gəlirlərin az, qiymətlərin baha olmasına qəzet “gəlirdə Afrika, qiymətlərdə Avropa standartı...” ironiyası bildirir.

“Yeni Müsavat” qəzeti gələn həftə ATƏT-in Bakıda keçirilməsi gözlənilən tədbirində Ruisya əleyhinə qərar qəbul ediləcəyini “Qərbin Kremlə Xəzər sahilində toqquşması” sayaraq ilk səhifəyə çıxarıb.

Polis qurumlarının “Badamdar” qəsəbəsində keçirdiyi əməliyyat zamanı vəhabi təriqətindən olan 20 şəxs saxlanıb.

Qəzet torpaq payndan məhrum edilən Qarabağ müharibəsi əlili Məmməd Tağıyevin intihar edəcəyi bəyanatı yaydığını nəzərə çatdırır.