Mətbuat-monitorinq 21.07.15

“Azadlıq” qəzeti rəsmi Bakı ilə Avropa İttifaqı arasında yaşanan indiki böhran durumu zamanı qurum prezidenti Donald Tuskun bu günlərdə Azərbaycana gözlənilən səfərini “rəsmi Bakı üçün çətin müzakirələrin başlaması” adlandıraraq manjetə çıxarıb.

Azərbaycanda yaşanan siyasi repressiyaların bu günlərdə ABŞ Senatında müzakirə olunmasını qəzet rəsmi Bakının Qərb ilə anlaşdığı iddialarının alt-üst olması kimi dəyərləndirir.

Təhsil Nazirliyi maliyyə idarəsinin keçmiş müdir müavini, bir müddət həbs həyatı yaşayan məşhur şair Əli Kərimin oğlu Orxan Kərimov vəfat edib.

Hökumətyanlı “Ana Vətən” partiyasının sədri Fəzail Ağamalı mətbuat katibini Almaniyanın bayrağını kompüterinə örtük şəkli etdiyi üçün işdən qovub.

Qəzet rəsmi Bakının “Azərbaycan saatı” proqramının rəhbəri Qənimət Zahidin nəslinə qarşı kütləvi repressiyalara başladığını, iki qardaşı və bir əmisi oğlunun saxta ittihamlarla həbs edildiklərini nəzərə çatdırır. 

Keçmiş diplomat Arif Məmmədov rəsmi Bakının Qərbə təhdidlərinə “Qərbə ultimatum veməyin, ölkə və xalq üçün ağır nəticələr doğura biləcək düşünülməmiş addımdır” şərhi verib.

Azərbaycan XİN başçısı Elmar Məmmədyarovun Rusiya ilə apardığı danışıqları politoloqlar qəzetə “Azərbaycan üçün təhlükəli danışıqlar” kimi dəyərləndiriblər.

Qəzetə şərh verən ekspertlər Beynəlxalq banka büdcədən irihəcmli vəsaitlər xərcləndikdən sonra onun özəlləşdirilməyə çıxarılmasını “bankı satmaq yox, kiməsə hədiyyə etmək” kimi qiymətləndiriblər.

“Yeni Müsavat” qəzeti rəsmi Bakı ilə münasibətlərdə ABŞ-ın “Azərbaycandaxili siyasətlə bağlı tələblərindən geri çəkildiyini” yazır və bunu “Bakı ilə Vaşinqton arasında sensasion razılşama” iddiası kimi önə çıxarır.

Qəzetin iddiasına görə, əmlak komitəsinin sədri Kərəm Həsənovun qardaşı deputat Malik Həsənovun adı Beynəlxalq Bankla bağlı kredit qalmaqalına qarışdığna görə deputat mandatı geri alınır. 

Ekspertlər rəsmi Bakının müharibə hazırlığı aparması fonunda Kremlin bölgəyə “sülhməramlı qüvvələr” yerləşdirmək planının ciddi narahatlıq doğurduğunu və bunun Qarabağın əbədi itiriləcəyinə səbəb olacağını bəyan edirlər.

Qəzet Gədəbəydə heyvanların otarılması üçün hər heyvana görə 1 manat “töycü” alınmasını “icra başçısının otlaq sahələrini özünün varlanmaq poliqonuna çevirməsi” kimi şərh edir.

Ekspertlər ölkənin bank sistemində əmanətlərin əksərinin sığortalanmamasının nəticə etibarı ilə “bank sistemini zərbə altında qoyacağı” kimi dəyərləndirirlər.