Mətbuat-Monitorinq 21.09.15

Rəsmi qəzetlər dövlət başçısı İlham Əliyevin bəzi fərmanlarının mətnlərini ilk səhifələrdə yerləşdiriblər.

“Azadlıq” qəzeti paytaxtda baş vermiş 3 intihar hadisəsini “ölkədəki böhran daha 3 can aldı” başlığı ilə manjetə çıxarıb.

Qəzet insan haqları, seçki prosesi, ölkənin iqtisadi həyatı ilə bağlı tənqidi mövzulara üstünlük verib.

Sumqayıtda polis əməkdaşları AXCP-nin şəhər təşkilatına konfrans keçirməyə imkan verməyiblər.

“Meydan Tv”nin 3 xanım əməkdaşı aeroportda saxlanılaraq “bandotdel”ə aparılıb, siyasilər iqtidarın bu addımını “azad mətbuata qarşı savaşın tərkib hissəsi” sayırlar.

Hüquq müdafiəçisi Taleh Xasməmmədov qanunların yox, mafiozların iradəsinə görə həbsdə saxlanması barədə müraciət yayıb.

Beynəlxalq qurumların Azərbaycanda keçiriləcək seçkiləri tanımaq istəməməsini ekspertlər “ölkə hakimiyyətinin beynəlxalq aləmdə təklənməsi” adlandırırlar.

Ölkə sənayesində 5 milyard manat azalmanı ekspertlər “əhali və büdcənin gəlirlərinin azalması, yoxsulluq və işsizliyin artacağı” kimi şərh edirlər. Ölkədə dərmanların qiymətlərinin ucuzlaşması barədə qərara toxunan ekspertlər bu halın “gizli dərman alverçilərinə şərait yaratması” kimi dəyərləndirirlər.

Belaruslu hüquq müdafiəçisi Aleks Belyatski Avropa İttifaqı sanksiyalarının Azərbaycanda vəziyyəti dəyiçə biləcəyi haqda bəyanat səsləndirib.

“Yeni Müsavat”  Moskvada məscid açılışı ilə bağlı Azərbaycan, Türkiyə prezidentlərinin səfərini “Allah Evi”nin prezidentləri Kremlə yığması başlığı ilə ilk səhifəyə çıxarıb.

Sabunçu I seçki dairəsindən  deputatlığa namizəd Yeganə Hacıyevaya imza toplayan iki xanıma hücum olub, imza vərəqələri əllərindən alınıb.    

Müxalif siyasətçilər yerlərdə müxalif namizədlərə yaradılan problemlərin get-gedə artdığını, seçki prosesinin gözlənildiyindən də ağır şəraitdə keçdiyini bəyan edirlər.

1994-cü il sentyabrın 20-də imzalanan neft kontraktları layihəsindən keçən dövrə münasibətdə ekspertlər “neft gəlirlərindən xalqın faydalanmadığı”, digər qisiminin isə “faydalandığı” kimi bir-birinə zidd iki qütbə bölündükləri bildirilir.