Meydan TV saytı ilə əməkdaşlıq edən 3 jurnalist saxlanıb və azad buraxılıb (YENİLƏNİB)

Sentyabrın 20-də gecə yerli vaxtla saat 1 radələrində Bakı hava limanında saxlanan Meydan TV ilə əməkdaşlıq edən 3 müstəqil jurnalist gündüz saat 12.30-da sərbəst buraxılıb.

Ukraynadan təlimdən qayıdan jurnalistlər - Sevinc Vaqifqızı, Aytən Fərhadova və İzolda Ağayeva hava limanında saxlandıqdan sonra Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinə gətirilib.

Jurnalist Sevinc Vaqifqızı Turana  bildirib ki, gecə saat 1-də saxlanmalarına baxmayaraq yalnız gündüz saat 12 radələrində onlardan izahat alınıb.

“Bizi Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinin istintaq idarəsinin rəis müavini Murad Quliyev dindirdi. Dindirmə əsasən Mingəçevir hadisələri və Meydan televiziyasının fəaliyyəti ilə bağlı idi. Bildirdik ki, bundan öncə eyni məzmunlu ifadələri Baş Prokurorluğun Ağır Cinayətlərə dair İşlər üzrə İstintaq İdarəsində vermişik. O dedi  ki, istintaqın bəzi məqamlarını Baş Mütəşəkkil Cinayətkarlıqla Mübarizə İdarəsi aprır. İzahatlarımızı aldırqdan sonra hər üçümüzü azad buraxdılar. Saxlanan zaman götürülmüş şəxsi əşyalarımızı, pulumuzu və jurnalist ləvazimatlarımızı özümüzə qaytardılar”, o qeyd edib.

2015 Sentyabr 20 (Şəmbə) 10:38:05

Meydan TV ilə əməkdaşlıq edən üç xanım jurnalist - Aytən Fərhadova, Sevinc Vaqifqızı və İzolda Ağayeva  Bakı hava limanındakı sərhəd keçid məntəqəsinin əməkdaşları tərəfindən saxlanıb, barələrində akt tərtib edilib və DİN əməkdaşlarına təhvil verilib. Onlar sentyabrın 20-nə kecən gecə  Kiyevdən media təlimindən qayıdırmışlar.

Meydan TV ilə əməkdaşlıq edən xanım jurnalistlər DİN Hava Nəqliyyatında polis idarəsindən Mütəşəkkil Cinayətkarlığa Qarşı Mübarizə İdarəsinə aparılıb. 

Bundan bir neçə gün əvvəl də Meydan Tv ilə əməkdaşlıq edən Şirin Abbasov da yoxa çıxıb, daha sonra onun DİN-nin Baş Mütəşəkkil Cinayətkarlıqla Mübarizə İdarəsində saxlandığı məlum olub. Sentyabrın 18-də Şirin Abbasov polisə müqavimətdə təqsirli bilinərək bir aylıq izibati həbs cəzası alıb.

Sentyabrın 16-da Meydan TV-nin iki xanım əməkdaşı da DİN-nin Baş Mütəşəkkil Cinayətkarlıqla Mübarizə İdarəsində dindiriliblər. Onlardan Meydan TV-dəki fəaliyyətləri, TV-nin rəhbəri, eləcə də Mingəçevir hadisələri zamanı polis bölməsində ölmüş Bəhruz Hacıyevin morqdakı videosunu kimin və necə çəkməsi, müxbirlərin nə qədər maaş alması haqda soruşublar.

Daha öncə Meydan TV  ilə əmzəkdaşlıq edən jurnalistlər həmin mövzularla baəlı prokuruluqda dindirliblər.—0--