Mətbuat-Monitorinq 21.10.15

Rəsmi qəzetlər dövlət başçısı İlham Əliyevin İranın Şərqi Azərbaycan vilayətinin valisini, Birləşmiş Ərəb Əmirlikləri, İsveçrə dövlətlərinin Azərbaycandakı səfirlərinin etimadnamələrini qəbul etməsi haqda xəbərləri, M.Quliyevin MTN rəhbərinin birinci müavini vəzifəsinə təyin edilməsinə dair sərəncamın mətnini ilk səhifələrdə yerləşdiriblər.

“Azadlıq” qəzeti MTN-in yüksək rütbəli 7 əməkdaşının həbsi və “dəhşətli cinayətlərin üzə çıxması”nı manjetə çəkib. Bundan əlavə, qəzet bu həbslər və onlara reaksiyalara yer verib. Eyni zamanda ölkənin iqtisadi həyatı da təhlillərdən kənarda qalmayıb.

Rəsmi Bakının MTN-in keçmiş şefi Eldar Mahmudovu ağır cinayətlərdə suçlamasını ekspertlər əslində cəmiyyətin “Eldar Mahmudova münasibətini rejimə münasibətin göstəricisi” olmasına adekvat sayırlar.

AXCP sədri Əli Kərimli dövlət başçısı İlham Əliyevin sahibkarlıq obyektlərində yoxlamaların 2 il müddətinə dayandırılmasını “görüntüyə hesablanan təşəbbüs” kimi dəyərləndirir.

Ekspertlər sahibkarlıq subyektlərində vergi və gömrük yoxlamalarına ara verilmədiyi halda dövlət başçısının yoxlamaları ikillik  dayandırmaq təşəbbüsünün faydasının  olmayacağını bildiriblər.

İsveçrə araşdırmaçısı Xannest Meynerə görə,  rəsmi Bakının ölkədə vətəndaş cəmiyyəti institutlarını amansız şəkildə əzməsi neft pullarını maneəsiz mənimsəyə bilməsilə bağlı olub.

Vəkil Kamandar Nəsibov Beynəlxalq Bankla bağlı “kredit qalmaqalı”na görə həbs edilənlərin sıravi icraçılar olduğu, məsuliyyəti olanların azadlıqda qaldıqlarını bəyan edib.

Ekspertlər ölkə iqtisadiyyatında “payı” rəsmi olaraq olaraq 9% göstərilən “kölgə iqtisadiyyatı”nın  həcminin əslində 60% həddində olmasında israr edirlər.

Qəzet Ağcabədi rayonunda valyutadəyişmə ilə məşğul olanların itkin düşdüklərini yazır, rayon polisi isə bunun böhtan olması haqda açıqlama verir.

“Ekspress”  rəsmi Bakı təmsilçilərinin OPEC-in iclasına qatılmaması, Sabunçuda söküntülər başlaması mövzusunu gündəmə gətirib.

Gürcüstanın energetika naziri Kaxa Kaladze Azərbaycanın Gürcüstanın qaza olan  tələbatını ödəyə bilməməsi bəyanatını səsləndirib.

Bakının Səbayel rayon icra başçısı Eldar Əzizova görə, MTN generallarının həbsinə səbəb “harınlamaları və dövlət başçısına sadiq qalmamaları”dır.

“Exo”  “büdcə mehmanxanaları” şəbəkəsinın yaradılmasını turistlərin ölkəyə cəlb edilməsi üçün zəruri olması mövzusunu önə çəkib.

“Novoe Vremya”  2016-cı il büdcəsinin kasıblara yoxsulluq vəd etməsi iddiasını diqqət mərkəzinə çəkib.

“Bizim yol” general Mədət Quliyevin MTN-ə birinci müavin təyinatını, dövlət başçısının MTN –də struktur dəyişikliyi haqda fərman imzalamasını, MTN-in keçmiş şefi  Eldar Mahmudovun oğlunun biznesi barədə araşdırmasını ilk səhifəyə yerləşdirib.

Qəzet terrorçuluğun maliyyləşdirilməsinə qarşı mübarizə ilə bağlı qanunlara cəzaları sərtləşdirən iki maddə əlavə olunduğunu nəzərə çatdırır.

“Yeni Müsavat” MTN generallarının həbsləri, evlərindəki axtarışlar və MTN-in keçmiş şefi Eladar Mahmudovun adamlarının nəzarətə alınması mövzusunu ilk səhifəyə çıxarıb. Bundan əlavə,  bu hadisəyə şərhlər də qəzetdə özünə yer alıb.

Demokrat Partiyasının sədri Sərdar Cəlaloğlu MTN ətrafında baş verənləri “iqtidar daxilindəki qüvvələrin yaranan iqtisadi böhran və beynəlxalq situasiyadan istifadə edərək hakimiyyəti ələ almaq cəhdi” kimi təsnif edib.

Qəzetin iddiasına görə,  nazir Ziya Məmmədovu iqtidarla heç də “rahat olmayacaq söhbət” və MTN-in keçmiş şefi Eladar Mahmudovun taleyi gözləyir.

“Texnikabank”ın Müşahidə Şurasının sədri Rövşən İsmayılovun vəzifəsindən istefasını qəzet Beynəlxalq Bankın keçmiş rəhbəri Cahangir Hacıyevin sonuncu adamının vəzifəsini itirməsi kimi dəyərləndirir.