Mətbuat-Monitorinq 21.11.13

Rəsmi və iqtidaryönlü qəzetlər dövlət başçısı İlham Əliyevin Avropa komanda çempionatında qalib olan Azərbaycan şahmat komandası üzvlərini qəbul etməsi, ədliyyə sistemi əməkdaşlarının bir qrupunun dövlət mükafatları ilə təltif edilmələri haqda imzalanan sərəncamlar, Belarus dövlət başçısı A.Lukaşenkonun Azərbaycana səfəri haqda yazırlar. 

“Azadlıq” qəzeti Azərbaycanda 2014-cü ildən “Avro-3” standartlarının tətbiqinin yanacağın qiymətinin artmasına təsiri ola bilməsi haqda rəsmi açıqlamanı manjetə çıxararaq bunu “benzinin bahalaşmasının rəsmi təsdiqi” kimi dəyərləndirir. 

Əmək və Əhalinin Sosial Müdafiəsi Nazirliyinin vəzifəli şəxslərinin ünvanlı sosial yardımları mənimsəmələrilə bağlı həbs oluna bilmələrini qəzet “məmurların kütləvi həbsinin gözlənilməsi” hesab edir. 

Bakı metropoliten rəhbərliyinin metro stansiyalarında qəzet-kitab satışını “terror təhlükəsi”lə bağlı qadağan etməsi haqda mövqeyini media mənsubları “indiyə qədərki ən absurd mövqe” kimi şərh edirlər.

Milli Şurada Rüstəm İbrahimbəyovun qurumda rəhbər vəzifədə qalıb-qalmaması məsələsində islamçılar R.İbrahimbəyova dəstək veriblər.  

Qəzet Azərbaycanda narkotik vasitədən istifadə ilə bağlı 5 min adamın məhkum həyatı yaşadığını bildirir.

ABŞ Konqresmeni Dana Rohrabaker konqresə “Cənubi Azərbaycanın müstəqilliyi” haqda qətnamə layihəsi təqdim edib.

“Zerkalo”. Rusiyanın Ermənistanla birgə HHM sistemi qurmasının çətiri altına “DQR”-in də düşə biləcəyini yazan qəzet bunu Azərbaycana qarşı “hədələrin get-gedə daha da çoxalması” kimi şərh edir. 

Deputat Səməd Seyidovun İsrail səfərindən sonra bu dövlətlə viza rejiminin sadələşdirilıməsi məsələsinin aktuallaşmasını qəzet “İsrailə məxfi missiya ilə” adlandırır. 

Qəzet araşdırmalara istinadən repetitorluğu ölkə müəllimlərinin 80%-nin əlavə gəlir mənbəyi olduğunu bildirir.  

“Ekspress” yazır ki, rus politoloru RF-nin MDB xalqlarına təzyiqlərini MDB-dən kənar özünü qüdrətli dövlət hesab etmək üçün digər məkan olmaması” ilə əlaqələndirir. 

Qəzet seysmoloqlara istinadən Bakıda 9 ballıq zəlzələ olduğu halda bütün köhnə tikililərin dağılacağı barədə xəbərdarlıq edir.  

“Exo” ekspertlərə istinadən ölkədə şoran torpaqların tam təmizlənməsi üçün hər il 500 milyon manat vəsait qoyulmaqla 5 il vaxt lazım olduğunu qeyd edir. 

“Bizim yol” Neft Fondunun 7 törəmə şirkət yaradaraq offşor zonalara pul yatırdığını, ölkədə isə yalnız depozit şəkildə “Bank VTB”-yə yatırıldığını qeyd edir.

“Yeni Müsavat” yazır ki, Azərbaycanda turizm və inşaat sahəsində çalışan türk iş adamı Türkmən Çayır Əmlak Komitəsinin onu bu layihədən uzaqlaşdırmağa çalışdığı üçün komitənin rüşvət mexanizmini açıqlayacağı barədə xəbərdarlıq edib. 

Milli Şuranın lideri Cəmil Həsənlinin seçkilərdən qısa müddət sonra ABŞ-a dəvət edilməsini ekspertlər “ABŞ-ın Azərbaycanda demokrariyanın durumu ilə bağlı narahatlığını göstəricisi” kimi dəyərləndiriblər. 

Qəzet yazır ki, Dövlət Neft Şirkəti gələn ildən hasil edilən nefti xam şəkildə xarici bazara çıxarmadan daxildə benzin emalına yönəldəcəyini bəyan edib.

Tanınmış iqtisadçı Qubad İbadoğlu ölkədə neft hasilatının azalmasına “neft erası”nın başa çatmaqda olması, bu gəlirlərin xərclənməsində gələcək nəsillərin unudulmaması” mövqeyini ifadə edib.