Azərbaycanlı hüquq müdafiəçiləri demokratiya problemləri ilə bağlı Avropa Şurasını məlumatlandıracaq

Bir qrup azərbaycanlı hüquq müdafiəçisi noyabrın 27-29-da Strasburqda keçiriləcək demokratiyanın dəstəklənməsi üzrə Ümumdünya Forumunda iştirak edəcək.

Helsinki Vətəndaş Assambleyasının Azərbaycan Milli Komitəsinin rəhbəri  (HVAAMK) və təşkilatın həmsədri Arzu Abdullayeva Turan-a bildirib ki, AŞ_nin insan hüquqları üzrə komissarı Nils Mujnieks, AŞ Nazirlər Komitəsi Monitorinq Qrupunun üzvləri, təşkilatın müxtəlif departamentlərinin və  AŞPA komitələrinin nümayəndələri ilə görüşlər planlaşdırılıb.

Ola bilsin ki, AŞPA-nın Azərbaycan üzrə məruzəçiləri ilə görüş olsun.

Azərbaycanlı hüquq müdafiəçiləri ölkədə insan hüquqlarının vəziyyətinin pisləşməsi, siyasi məhbusların sayının artması, söz, mətbuat, ifadə, toplaşma və assosiasiya azadlığı ilə bağlı ciddi problemlərin olmasını AŞ nümayəndələrinin diqqətinə çatdıracaqlar. 

AŞ Azərbaycanın AŞ Nazirlər Komitəsində sədrliyə başlaması ərəfəsində ölkənin bu təşkilat qarşısındakı öhdəliklərini yerinə yetirməsinə diqqəti artırmağa çağırılacaq. 

Demokratiyanı dəstəklənməsi üzrə Ümumdünya Forumuna gəlincə, gündəliyə Avropada demokratiya üzrə yeni çağırışlarla əlaqədar məsələlər – vətəndaşların seçkilərdə iştirakının fəallığının azalması, korrupsiya qalmaqalları nəticəsində vətəndaşların öz liderlərinə inamsızlığının artması, sosial institutlar və cəmiyyət arasında uçurumun yaranması daxildir.

Siyasi iştirakın ənənəvi formaları öz yerini sosial şəbəkələrə verir. Bu, siyasi və ictimai xadimlərə hər zaman  əhali ilə ünsiyyətdə olmaq imkanı yaradır. Sosial şəbəkələr maraqlar üzrə birliklərin çoxluğuna səbəb olur, lakin əsl demokratik polemika üçün platforma qismində hələlik çətinliklə qəbul edilir.

“Vətəndaş etirazları və demokratik inqilablar üçün məkan olan sosial şəbəkələr demokratiya və cəmiyyətin gündəlik idarə edilməsi proseslərinə həqiqətən yeni təkan verməyə qadirdir? Ənənəvi  iştirak formalarının gələcəyi necə olacaq?, Yeni və ənənəvi iştirak formaları bir-birini necə tamamlayır?”, -AŞ-nin məlumatında deyilir.

Bu suallara cavab tapmaq üçün AŞ bütün dünyadan siyasi xadimləri, ekspertləri, jurnalistləri, gənclər və vətəndaş cəmiyyətinin nümayəndələrini “Demokratiyanın yenilənməsi: sosial institutlar və vətəndaşlar arasında əlaqənin rəqəmsal dövrdə bərpası” şüarı ilə demokratiyanın dəstəklənməsi üzrə Ümumdünya Forumuna dəvət edib.

Forumda Fransa prezidenti Fransua Olland təbrik nitqi ilə çıxış edəcək. Çıxışçılar arasında AŞ baş katibi Turbörn Yaqland, pakistanlı hüquq müdafiəçisi və bloger Malala Yusafzay və başqaları olacaq.

Forum Strasburq şəhər meriyası, Fransa hökuməti və Elzass regionu rəhbərliyi tərəfindən təşkil edilib. 06B--