Əfqan Sadıqov Tbilisi İstintaq Təcridxanasında huşunu itirib

Azərbaycanın “Azel” TV saytının rəhbəri, fevralın 2-dən Tbilisi İstintaq Təcridxanasında quru aclıq edən Əfqan Sadıqov çərşənbə axşamı huşunu itirib. Bu barədə Turan-a onun xanımı Sevinc Sadıqova bildirib.

"Axşamdan  Əfqanın vəziyyəti çox pis idi. Səhərə qədər huşsuz olub. Həkimlər dedilər ki, istintaq təcridxanasında müvafiq şərait yoxdur və əgər aclığa davam edərsə, Əfqan klinikaya köçürülməli olacaq", - Sadıqova deyib.

Bununla belə, Əfqan aclığı dayandırmaq  niyyətində deyil.

Öz növbəsində vəkil Mariam Kvelaşvili Turan-a bildirib ki, Əfqan Sadıqovun vəziyyətindən xəbərdardır.

* Əfqan Sadıqov təqiblərdən ehtiyat edərək 2023-cü ilin dekabrında ailəsilə birlikdə Gürcüstana gedib. İyulda onu  Gürcüstandan Türkiyəyə buraxmayıblar və deyiblər ki, ancaq Azərbaycana qayıda bilər.

2024-cü ilin avqustunda Sadıqov Azərbaycanın sorğusu əsasında həbs edilib. Bakıda onu hədə yoluyla tələb etməkdə ittiham edirlər və ekstradisiyasını tələb edirlər. Həbs olunmasına və ona sığınacaq verilməsindən imtina edilməsinə etiraz edərək sentyabrın 21-dən aclıq edir. Gürcüstan hakimiyyəti ona siyasi sığınacaq verməkdən imtina edib.

Noyabrın 28-də Tbilisi Şəhər Məhkəməsi Sadıqovun Azərbaycana ekstradisiyası barədə qərar qəbul edib. 2025-ci il yanvarın 15-də Tbilisi Apellyasiya Məhkəməsi bu qərarı təsdiqləyib, yanvarın 31-də Tbilisi məhkəməsi Əfqan Sadıqovun həbs müddətini üç ay uzadıb.