Tramp İrana "maksimum zərbə" endirir və Qəzza sektorunu idarə etmək istəyir

Çərşənbə axşamı ABŞ prezidenti Donald Tramp ilk beynəlxalq qonağını - İsrailin baş naziri Binyamin Netanyahunu Ağ Evdə qarşılayıb.

Görüş zamanı Tramp ABŞ-ın Qəzza zolağına nəzarət   edə biləcəyini ehtimal etdiyini bildirib, Turan-ın Vaşinqton müxbiri Ağ Evdən bildirib.

"Biz bu hissəni götürmək niyyətindəyik", - Tramp birgə mətbuat konfransında Qəzza haqqında deyib. "Biz onu inkişaf etdirmək, minlərlə iş yeri yaratmaq niyyətindəyik və bu, bütün Yaxın Şərqin fəxr edə biləcəyi bir şey olacaq", - o  deyib.

“Amerika qoşunlarını oraya göndərəcəkmi?” sualına Trampbelə  cavab verib: "Qəzzaya gəlincə, lazım olanı edəcəyik. Zərurət yaranarsa, edəcəyik".

Öz növbəsində Netanyahu Trampın ideyasını təkrarlayıb: "Biz bunu müzakirə edirik. Düşünürəm ki, bu, tarixi dəyişdirə biləcək bir şeydir və həqiqətən yoxlamağa dəyər".  

Onlar İranı da müzakirə ediblər. "Mənim üçün hər şey çox sadədir: İranda nüvə silahı ola bilməz", - Tramp deyib. Tehranın silahlara nə qədər yaxın olması barədə sualın cavabında Tramp əlavə edib: "Onlar çox yaxındırlar".

Netanyahu deyib ki, Tehran öz regional tərəfdarlarını itirdikdən sonra onilliklər ərzində bütün Yaxın Şərqə təsir etdiyi alətlərsiz qalıb. Netanyahu ilə görüşdən əvvəl Tramp ilk prezidentlik dövründə istifadə etdiyi “İrana “maksimum təzyiq” siyasətinin bərpasına dair memorandum imzalayıb.

Administrasiyanın yüksək vəzifəli məmurlarının sözlərinə görə, bu tədbirlər Tehranın nüvə silahı əldə etməsinə yol verməmək üçün İran neftinin ixracını sıfıra endirməyə yönəlib.