Hikmət Babaoğlu: "Bu, natamam bir rəydir"

Qazaxıstan Nəqliyyat Nazirliyinin "Azərbaycan Hava Yolları"nın (AZAL) Aktauda qəzaya uğrayan təyyarəsi ilə bağlı təhqiqata dair ilkin hesabatı bu məsələ ətrafında müzakirələri yenidən gündəmə daşıdı. Qəza Qazaxıstan ərazisində baş verdiyindən təhqiqatı da həmin ölkənin apardığı bildirilir.

Hesabatda qeyd edilir ki, qəzaya uğrayan AZAL təyyarəsi yer səthi ilə toqquşana qədər xarici təsirə məruz qalıb. Eyni zamanda, təyyarənin uçuşdan əvvəl texniki vəziyyəti yaxşı olub.

Hesabatda qəzanın səbəbi kimi əvvəllər dilə gətirilən "quş sürüsü ilə toqquşma" və "oksigen balonun partlaması" kimi versiyalar da təsdiqini tapmır.

Yeni Azərbaycan Partiyasından Milli Məclisin deputatı Hikmət Babaoğlu Turana bildirib ki, yayılan ilkin hesabatda 10 bənddən ibarət mütəxəssis rəyləri var: “Birincisi, bu rəylər təsdiq edir ki, təyyarədə qəza anına qədər heç bir texniki qüsur olmayıb, heç bir defekt aşkar edilmədi və təyyarə kənar obyektinə müdaxilə etməsi nəticəsində zədə alıb. Azərbaycan bu versiyanı ilk günlərdən irəli sürmüşdü, çünki bu barədə kifayət qədər məlumatlı idik. Amma təəssüf ki, hesabatda kənar müdaxilənin nə olduğunu qeyd olunmur”.

Deputat hesab edir ki, ilkin nəticələrdə bu qeyd olunmalı idi: “Çünki təyyarəyə dəyən kənar obyektlərin qırıntıları var və bunları nə olduğunu təyin etmək çox asandır. Mənə elə gəlir ki, elə ilkin araşdırmada yazılmalı idi ki, təyyarə hücuma məruz qalıb. Eyni zamanda təyin edib məlumat vermək olardı ki, bu kənar obyekt nədir, hansı silaha məxsusdur və hansı göstəriciləri var. İlkin rəydə bildirilir ki, bu barədə məlumat yekun rəydə veriləcək. Yekun rəy isə 1 il müddətində elan oluna bilər”.

H.Babaoğlu qeyd edib ki, bu doğru hesab edilə bilməz: “Çünki belə faciə baş veribsə, operativ qiymətləndirmə aparılmalıdır”.

Onun fikrincə, ilkin rəydə müsbət məqamlar da var: “Pilotlar Bakıya dönüşə qərar verdikləri qeyd olunur. Amma nə üçün sonra Aktauya getdikləri qeyd olunmur. Halbuki komissiyada bu barədə məlumat var. Çünki onlar “qara qutulardan” məlumatları və pilotların dispetçerlərlə danışıqları əldə ediblər. Burada da bir yarımçıqlıq var. Biz hələlik deyə bilərik ki, bu natamam bir rəydir, halbuki daha dolğun rəy ola bilərdi. Ümid edirik ki, 1 il keçmədən, lap yaxın günlərdə yenidən bir daha ətraflı ilkin nəticələrin elan olunmasını görə biləcəyik”.

H.Babaoğlu qeyd edib ki, təyyarənin qəzası ilə bağlı Rusiyaya ünvanlanmış şərtlər qüvvədə qalır.

"Atlas" Araşdırmalar Mərkəzinin rəhbəri Elxan Şahinoğlu isə AzadlıqRadiosuna bildirib ki, hesabatda yazılanlar əslində məlumun elanıdır: "Təyyarə qəza uğrayandan bir neçə gün sonra üzə çıxdı ki, təyyarədə deşiklər var və hamı başa düşdü ki, təyyarə raketlə vurulub. Hətta raketin adı da çəkildi. Azərbaycan prezidenti İlham Əliyev müsahibə verdi, bildirdi ki, "quş sürüsü" və "oksigen balonunun partlaması" versiyaları bəhanədir".

O vurğulayıb ki, rəydə "raket" sözü olmasa da, kənar müdaxilə ifadəsi var: "Bu isə faktiki olaraq raketlə vurulması deməkdir. Rusiya mətbuatı da hesabatın yayılmasını yazsa da, mətnlə bağlı əsasən heç nə vermədi. Bu ondan xəbər verir ki, əslində Rusiya nə kompensasiya ödəyəcək, nə də cinayətkarları cəzalandıracaq".