Əziz Orucovun məhkəmə prosesində

Fevralın 5-də Səbail Rayon Məhkəməsində “Kanal-13” İnternet- nəşrin rəhbəri əziz Orucovun işi üzrə proses davam edib.

Vəkil Bəhruz Bayramov Turan-a bildirib ki, prosesdə Daşınmaz Əmlakın Dövlət Kadastrı və Reyestri Xidmətinin nümayəndəsini dinləyiblar.

Bayramovun sözlərinə görə, məmur Orucovun dövlətə hansı ziyanı vurduğunu aydın izah edə bilməyib.

Qurumun əməkdaşı ancaq onu deyib ki, bunlar dövlətin torpaqlarıdır. "Lakin Orucovun ev tikdiyi yerin ətrafında çoxlu yaşayış binaları tikilib. Dövlətə dəyən ziyanla bağlı şikayətlər verilibmi?", - vəkil deyib və qeyd edib ki, məmur bu suala cavab verə bilməyib.

Orucovun daha iki qonşusu şahid qismində dindirilib. "Onlar deyiblər ki, Orucovun ev tikməsilə bağlı iradları yoxdur”,- Bayramov deyib.

Növbəti iclas fevralın 26-na təyin edilib.

* Əziz Orucov 27 noyabr 2023-cü ildə özbaşına tikinti ittihamı ilə saxlanılıb. Daha sonra qaçaqmalçılıqda ittiham olunub. Lakin ibtidai istintaqın nəticələrinə əsasən qaçaqmalçılıq ittihamı ləğv edilib.

Sonradan ona qarşı Cinayət Məcəlləsinin 206.3.2-ci (qabaqcadan əlbir olan bir qrup şəxs tərəfindən qaçaqmalçılıq) maddəsilə ittiham irəli sürülüb.

İş məhkəməyə Cinayət Məcəlləsinin 188.2-ci maddəsilə  (mülkiyyət hüququ olmadan icazəsiz tikinti) verilib. Bu ittihamla onu bir ildən üç ilə qədər məhdudiyyət və ya həbs təhlükəsi gözləyir.

Əziz Orucov ittihamları rədd edir. Hüquq müdafiəçiləri onu siyasi məhbus kimi tanıyıblar.