Mətbuat-Monitorinq 22.02.13

Rəsmi və hökumətyönlü qəzetlər dövlət başçısı İlham Əliyevin Yardımlı rayonunun sosial-iqtisadi inkişafı üçün 5 milon manat vəsait ayırması haqda sərəncamın mətnini dərc ediblər. Bundan əlavə, bu qəzetlərdə Moskva meriyasının Xocalı soyqırımı ilə bağlı aksiyaya verdiyi icazəni ləğv etməsi nəzərə çatdırılır. 

“Azadlıq” qəzeti keçmiş rektor Elşad Abdullayevin 2003-cü ildən itkin düşən qardaşı Mahir Abdullayevlə bağlı yaydığı növbəti videomaterialı manjetə çıxarıb və video-sənədin stenoqramını dərc edib. 

İctimai-siyasi blokda PA-nın rəhbəri Ramiz Mehdiyev və daxili işlər naziri Ramil Usubov tandeminə qarşı mübarizədə nazir Kəmaləddin Heydərovun Paşayevlərə dəstək verdiyi bildirilir. 

Cəlilabad rayon təhsil şöbəsinin müdiri Ədalət Əsgərov külli miqdarda yeyinti və korrupsiya halları aşkarlandığı üçün vəzifəsindəna zad olunub. 

Ölkənin media qurumlarının rəhbərləri “Azadlıq” qəzeti ətrafındakı durumu müzakirə edərək “iqtidarın qəzeti susdurmaq istəməsi” qənaətini ifadə ediblər.

Zaqatala, Şəki və Şirvanda kütləvi eitiraz aksiyalarının keçirilməsi “ölkəni aksiyaların yenidən bürüməsi” kimi dəyərləndirilir.

Korrupsiyaya Qarşı Mübarizə İdarəsi “Royalbank”da milyonlarla vəsaitin mənimsənilməsi ilə bağlı iki filialın rəhbərini həbsə alıb. 

“Bir-iki icra başçısını dəyişməklə vəziyyət dəyişməz, bütövlükdə sistem dəyişməli, dövlət başçısı isə iradə göstərməlidir”, - ekspertlər ölkədəki ictimai-siyasi duruma şərh veriblər. 

“Zerkalo” keçmiş rektor Elşad Abdullayevin ölkənin idarəetmə sistemini ifşa edən yeni video-sənədlər yaymasını “Gülərgeyt” serialının yeni mövsümünün başlaması” kimi dəyərləndirir.  

Ölkənin bir neçə rayonunda kütləvi etiraz aksiyalarının keçirilməsi “İsmayıllının əks-sədası” kimi şərh olunur.

Zəlzələdən zərər çəkən Zaqatalanın Lahıc kənd sakinlərinin etiraz aksiyası “zərərçəkənlərin səbrinin sona çatması” adlandırılır.

“Ekspress” Ermənistanda prezident seçkilərinin nəticələrilə bağlı Türkiyə prezidentinin Sarkisyanı təbrik etməsi faktını ilk səhifəyə çıxarıb, Bakının bu təbriki bəyənmədiyi bildirilir.

“Exo” İran agentliyinin Səudiyyə Ərəbistanını Azərbaycan vasitəsilə çeçen separatçılarına sponsorluqda ittiham etməsini manjetə çıxarıb. 

“Novoe Vremya” keçmiş rektor Elşad Abdullayevin yaydığı yeni videomaterialı “E.Abdullayevin yeni “bombası”nın DİN-in baş altına qoyulması” adlandırır. 

“Bizim yol” ölkədəki idarəetmə sistemini yaydığı videolarla ifşa etdiyinə görə keçmiş rektor Elşad Abdullayevin sahibi olduğu Beynəlxalq Universitetin binasının söküntüsünə başlanılıb.

“Yaban” restoranındakı “razborka”ya polisin müdaxilə etməyə məcbur qalmasını qəzet “məmurların “qudurğan uşaqları” nın polisi ayağa qaldırması” mövqeyini ifadə edir. 

Masallı rayon icra başçısı Rafil Hüseynov büdcəni dağıtmaqda, oğlu isə 3 nəfəri qətlə yetirməkdə suçlandırılır. 

“Yeni Müsavat” keçmiş rektor Elşad Abdullayevin 2003-cü ildən itkin düşən qardaşı Mahir Abdullayevlə bağlı növbəti video-sənəd yaymasını ilk plana çıxararaq fakta “E.Abdullayevin ölkə gündəmini yenə qarışdırması” mövqeyini ifadə edir.

Adi yol qəzasına görə həbsə alınan gənc müsavatçı Nigar Yaqublunun həbsdən azad olunmamasına “dövlət bu qızdan nə istəyir?” təəccübü ifadə edilir. 

Ali məktəb tələbələrinin sosial şəbəkə vasitəsilə 27 fevral “dərsləri boykot” aksiyasına cavab olaraq məktəb rektorlarının antitəbliğat kampaniyasına başladığı nəzərə çatdırılır.