Apreldə sərgi mövsümü başlayır

Aprel ayında “Iteca Caspian” şirkətinin beynəlxalq sərgilər mövsümünə start veriləcək. 2013-cü ilin yaz və yay aylarında “Iteca Caspian” şirkəti 10 sərgi və 1 konfrans keçirəcək ki, bunların da arasında həm ənənəvi, həm də debüt sərgilər var. Bu ilin ən mühüm tədbiri isə Azərbaycanın ilk ixtisaslaşdırılmış sərgi və konfransı - Beynəlxalq Xəzər Neft və Qaz, Neftayırma və Neft kimyası (“Caspian Oil and Gas”) sərgi və konfransının 20 illik yubileyidir. 

Sərgi mövsümünün açılışı isə ölkənin turizm sektorunun əsas tədbiri – “AITF 2013” 12-ci Azərbaycan Beynəlxalq Turizm və Səyahətlər sərgisi ilə başlayacaq (aprelin 4-dən 6-dək). Ənənəvi olaraq yay tətilinin və məzuniyyətlərin başlanğıcında keçirilən “AITF 2013” sərgisi elit istirahətdən tutmuş tibbi turizm sahəsinə qədər ən müxtəlif istiqamətləri əhatə edəcək. Bu il ilk dəfə olaraq sərginin ekspozisiyasında getdikcə populyarlaşan “Xaricdə daşınmaz əmlak” bölümü də fəaliyyət göstərəcək. Sərgidə dünyanın 34 ölkəsindən şirkət və təşkilatların iştirakı gözlənilir və həmin ölkələrdən 16-ı öz milli stendləri ilə çıxış edəcəklər. Bu il sərginin daimi iştirakçıları ilə yanaşı, Mərakeş, Macarıstan, Sloveniya, Tailand, Tunis, Fransa və Çernoqoriya kimi ölkələrdən də nümayəndə heyətləri Bakıya səfər edəcəklər. Həmçinin, Azərbaycanın turizm potensialını nümayiş etdirən, eləcə də Xaçmaz, Qusar, Quba, Qəbələ, Şəki, İsmayıllı, Lənkəran, Oğuz, Naftalan və ölkənin digər regionlarının turizm imkanlarını təqdim edən geniş regional ekspozisiya da planlaşdırılır. 

Son illər Azərbaycanda otel sahəsində müşahidə olunan inkişaf “HOREX Caucasus 2013” 7-ci Qafqaz Beynəlxalq Mehmanxanalar, Restoran və Supermarketlər üçün avadanlıq və ləvazimatlar sərgisinin əhəmiyyətini bir daha vurğulayır. Sözügedən sərgi həmin tarixlərdə “Bakı Ekspo” sərgi mərkəzinin ikinci pavilyonunda keçiriləcək.

Aprelin 1-də bu ilin debüt layihəsi – “CATEF 2013” Xəzər Beynəlxalq “Su texnologiyaları” sərgisi və forumu öz işinə başlayacaq. “CATEF 2013” sərgisi “Azərsu” ASC-nin təşəbbüsü və dəstəyi ilə təşkil olunur və beynəlxalq əməkdaşlığın inkişafı, təcrübə mübadiləsi, su və kanalizasiya sistemləri sektorunda yeni texnologiyaların tətbiqi, çirkab və yağış sularının təmizlənməsi, boru mühəndisliyi, habelə çay və göllərin çirklənmə səviyyəsinin azaldılmasına xidmət etmək məqsədi ilə həyata keçirilir. “CATEF 2013” sərgisində texnoloji şirkətlər, təchizatçılar, istehlakçılar, ekoloqlar və tikinti şirkətlərinin iştirakı gözlənilir. Sərgi ilə paralel olaraq, “Marriott” otelində içməli su təchizatı, müasir texnologiya və yeniliklərin tətbiqi sahəsində yeni proqramlara həsr olunmuş forum keçiriləcək və bu da qabaqcıl texnologiyaların nümayişi ilə sahənin aktual məsələlərinin müzakirəsini birləşdirməyə imkan verir.

Mayın 22-24-də Xəzər regionunun qida sənayesində böyük beynəlxalq tədbir – “WorldFood Azerbaijan 2013” sərgisi keçiriləcək.

İyunun 4-dən 7-dək mütəxəssislərin diqqəti Xəzəryanı regionda energetika sektorunun ən böyük tədbiri olan və bu il öz 20 illik yubileyini qeyd edən Beynəlxalq Xəzər Neft və Qaz, Neftayırma və Neft kimyası “Caspian Oil and Gas” sərgi və konfransına yönələcək.

Iteca Caspian-ın məlumatına görə, artıq sərgi meydançasının 70%-dən çoxu  sərgi və konfransın daimi iştirakçıları - məşhur şirkətlər tərəfindən tutulub. Onların arasında Azərbaycan Respublikası Dövlət Neft Şirkəti (ARDNŞ), “BP”, “Statoil”, “OMV”, “Total”, “Petkim”, “TPAO”, “RWE” və bir sıra digər şirkətlər də yer alır.

Bu il sərgi mövsümünün ilk yarısı 13-15 iyun tarixlərində keçiriləcək 12-ci Beynəlxalq Nəqliyyat, Tranzit və Loqistika “TransCaspian 2013” və 3-cü Xəzər Beynəlxalq Yol infrastrukturu və İctimai Nəqliyyat “Road & Traffic 2013” sərgiləri ilə başa çatacaq. Sərgi ekspozisiyasında dəmiryol, ictimai nəqliyyat, metro tikintisi və liman avadanlıqları sahəsində yeniliklər tam şəkildə nümayiş etdiriləcək. 08D