Mətbuat-Monitorinq 22.09.15

Rəsmi qəzetlər dövlət başçısı İlham Əliyevin Əlillərin Bərpa Mərkəzinin əsaslı yenidənqurmadan sonra açılışında iştirak etməsini ilk səhifələrdə yerləşdiriblər.

“Azadlıq” qəzeti Beynəlxalq Banka kredit borcu ilə bağlı həbslərin yeni dalğasınn başlamasını manjetə çıxarıb.

Qəzet ölkənin ictimai-siyasi və sosial-iqtisadi həyatına dair yazılara geniş yer verib.

“Meydan” TV-nin üç xanım jurnalisti bu gün yenə dindirilmək üçün “bandotdel”ə çağırılıblar, amma idarə jurnalistlərə çağırılmaq barədə sənəd təqdim etməyib.

Vəkil Elçin Sadıxov bütün səylərinə baxmayaraq “bandotdel” rəhbəriyinin ona sentyabrın 16-dan burada saxlanılan “Meydan” TV-nin əməkdaşı Şirin Abbasovla görüşə imkan vermədiyini bildirib.

Azadlıqdan məhrum edilən jurnalist Xədicə İsmayılın vəkili Fariz Namazlı sənədləri Apellyasiya Məhkəməsinə təqdim edib.

Ekspertlər rəsmi Kremlin Qarabağ problemilə bağlı səylərini artırmasını heç də Qarabağın azad olunması yox, Azərbaycanı tam formada nəzarətinə qaytarmaq kimi şərh edirlər.

General Bəylər Əyyubovun bacısı oğlu, Lənkəranın hərbi komissarı Əqid Bayroyev Masallı rayon hərbi komissarının oğlunun toyunda müğənni Nadir Qafarzadəni döydüyü üçün “bandotdel”ə aparılıb.

Əliyev rejiminin Avropadan üz döndərməsini ekspertlər “dövlət maraqlarının şəxsi maraqlara qurban verilməsi” kimi dəyərləndirirlər.

Qarabağ müharibəsi I qrup əlili, xərçəng xəstəsi Valeh Musayev borcu olmadığı halda Beynəlxalq Bankın göstərişinə əsasən borclu kimi ölkədən çıxmasına icazə verilmədiyini bildirir.   

“Ekspress” dövlətin ayırdığı pullara sevgi serialları çəkən telekanalların cəzalandırılacaqları haqda MTRŞ-nın mövqeyini ön plana çıxarıb.

“Exo” ölkədə orta aylıq maaşın 458 manat olduğunu yazaraq Bakıda 3 nəfərlik ailənin 122 pozisiyadan ibarət minimal əmtəə və xidmətlə təmin olunması üçün ayda 820 dollara malik olmasının vacibliyini diqqət mərkəzinə çəkib.

Ekspertlər ali məktəbə daxil ola bilmək üçün hazırlığa 4500 manat tələb edildiyini və bunun təmin edilməsi üçün ailələrin borca girməli olduqlarını qeyd edir.

“Bizim yol” Beynəlxalq Banka kredit borcu ilə bağlı bankir və iş adamlarının həbsini ilk səhifəyə yerləşdirib.

“Stratfor”a görə, 7 rayonun azad olunması, rus qoşunlarının bölgəyə yerləşdirilməsilə Qarabağda status-kvo dəyişdirilir.

“Yeni Müsavat” Beynəlxalq Bankla bağlı kredit qalmaqlalına görə həbslərə toxunaraq hədəfdə bir neçə icra başçısının da olmasını ilk səhifəyə çıxarıb.

Bu günlərdə Ukraynada terrorçu kimi həbs edilən universal döyüş növləri üzrə Avropa çempionu Valeh Əmirəliyev 2012-ci ildə Bakıda “Evrovision” yarışması ərəfəsində İlham Əliyevə sui-qəsd hazırlayan dəstənin üzvü kimi axtarışda olub.

Beynəlxalq Bankın keçmiş rəhbəri Cahangir Hacıyevə məxsus “CTZ-Aqro” şirkəti fermerlərə kredit ayırmaq barədə müqaviləni pozduğuna görə problem yaranıb, yetişdirilən pambıq sahələrdə batır.