Mətbuat-Monitorinq 22.11.12

Rəsmi qəzetlər dövlət başçısı İlham Əliyevin Sinqapura  səfərinə dair xəbərləri ilk səhifəyə çıxarıblar. 

“Azadlıq”. Fövqəladə hallar naziri Kəmaləddin Heydərova qarşı hücum başlanıb. Qəzet bunu “Heydərovu bitirmək” kimi dəyərləndirir və bu məsələdə nazirin ətrafının iqtidardakı rəqib qruplaşmadan şübhələndiyini bildirir. 

İqtidarı tənqid edən ziyalılara qarşı rəsmi Bakının kampaniya başlatmasına cavab olaraq müxalifət partiyaları iqtidara “bu  antimilli siyasətə son qoyun” tələbini ünvanlayıb. 

Rəsmi Bakının partiyaların maliyyə hesabat verməli olmaları ilə bağlı maliyyə formaları hazırlamasına siyasi partiyalar “dünyanın heç yerində partiyalar maliyyə hesabatı dərc etdirmir” cavabını veriblər və rəsmi Bakıya ölkədəki məktəbləri hansı pulla tikdirdiyi məlum olmayan Heydər Əliyev Fondunun maliyyə hesabatını açıqlamağı təklif ediblər. 

ARDNŞ Hollandiyanın “Vitees” komandasına sponsorluq etmək qərarına gəlib.     

ABŞ-ın Azərbaycandakı səfiri R.Morninqstarın müxalifət partiyaları liderlərilə görüşünə cavab olaraq YAP səfiri “qaçqın və köçkünlərin problemlərilə maraqlanmamaqda” ittiham edib. 

Vəkil Aslan İsmayılov deputatların xalq seçkisilə seçilməməsini “hazırda parlamentdə olan bir nəfər belə deyə bilməz ki, Ramiz Mehdiyevin siyahısı olmadan parlamentdə oturmuşam” kimi şərh edib. 

“Zerkalo” Moskvada Azərbaycan və Ermənistan Rusiya Təşkilatları İttifaqı kimi eyni adlı təşkilatlar yaradılmasını Kremlin hər iki ölkəyə təzyiqi sayaraq bunu “Putinin Azərbaycan və Ermənistan prezidentlərinə eyni ssenari üzrə basqısı” adlandırır. 

Partiyalar haqqında qanuna partiyaların maliyyə hesabatı verməsi haqda dəyişikliyin nəzərdə tutulmasını qəzet azad siyasi fəaliyyətin məhdudlaşdırılması kimi dəyərləndirir. 

“Ekspress”. Qobustan qapalı həbsxanasında məhkum intihar edib. Dustağın yaxınları intihara səbəb kimi məhkuma işgəncələrin verilməsini göstəriblər. 

“Exo” ölkədə biometrik pasportların gələn ildən veriləcəyini yazır. Amma etibarlılıq müddəti bitməyən köhnə pasportların taleyinin necə olacağı qeyri-müəyyən qalır.   

“Novoe Vremya” Bakıda Avropa Birliyi çərçivəsində demokratiya ilə bağlı müzakirələrin nəticəsiz qalmasına “müzakirələrlə demokratiya yaratmaq olmaz” mövqeyini ifadə edir. 

“Bizim yol”. ABŞ səfirinin Azərbaycan müxalifətilə qapalı görüşündə Rusiyanın Azərbaycana təzyiqlərinin müzakirə olunduğu ehtimal edilir. 

“Yeni Müsavat” rəsmi Kremlin Rusiyada azərbaycanlılardan ibarət şərti “milyarderlər ittifaqı” yaradılmasını alqışlamasını quruma dəstək sayır. 

Qəzet ABŞ səfiri Morninqstarın müxalifət partiyaları ilə görüşünü müəmmalı adlandırır, partiya sədrləri isə görüş haqda açıqlama vermirlər. 

Şərti “milyarderlər ittifaqı”nın üzvü Söyün Sadıqov Azərbaycanda həbsdə olan hüquq müdafiəçisi Hilal Məmmədovun azad edilməsi üçün Rusiya patriarxı Kirilə müraciət ünvanlayıb.  

“Bakı Xəbər” ölkədə avro və dolların bahalaşa biləcəyi barədə xəbərdarlıq edərək Valyuta Fondunun Azərbaycan Mərkəzi Bankına çevik məzənnə siyasətinə keçməsi tövsiyəsini xatırladır.