Mətbuat-Monitorinq 23.02.13

Rəsmi və hökumətyönlü qəzetlər dövlət başçısı İlham Əliyevin Qax rayonunun sosial-iqtisadi inkişafı üçün 3 milyon manat ayırması ilə bağlı sərəncamın mətnini, Xocalı faciəsinin növbəti ildönümü ilə bağlı məqalələr dərc ediblər. 

Bundan əlavə, bu qəzetlərdə müxalifətin aparıcı qüvvələri, Ziyalılar Forumu, AXCP sədri Əli Kərimli konkret təhqir, qaralama, böhtan hədəfidir.

“Azadlıq” qəzeti yaydığı videolarla iqtidarı ifşa edən keçmiş rektor Elşad Abdullayevə məxsus Beynəlxalq Universitetin, “Olimpiya kafesi”nin və idman kompleksinin sökülməsi xəbərlərini manjetə çıxarıb.

İctimai-siyasi blokda həbsdə olan gənc müsavatçı fəal Nigar Yaqubluya qəzet verilmədiyi bildirilir. 

İslam Partiyası xalqın haqlarının dövlət idarələrində təmin olunmamasına “bu durum tələb edir ki, vətəndaş haqqını meydanlarda tələb etsin” mövqeyi ifadə edib. 

Bankir Cahangir Hacıyevin nəzarətində olan ayaqqabı satışı inhisarının nazir Kəmaləddin Heydərovun əlinə keçməsi “bankirə zərbə” sayılır. 

Ekspertlər rəsmi Bakını proqramlaşdırma fəaliyyətini anlamamaqda, maliyyə vəsaitlərini “haraya və necə gəldi” ayırmaqda ittiham ediblər.

“Ekspress” qəzeti Ermənistan prezidentini təbrikə görə rəsmi Bakının tənqidinə məruz qalan rəsmi Türkiyənin “təbrikimiz dövlət ənənənmizə uyğundur” cavabını ilk səhifəyə çıxaırb. 

“Exo” qəzeti ekspertlərə isnadən gəlirlərlə bağlı bəyannamənin tətbiqindən sonra büdcə gəlirlərinin 500 miyon manatla 2, 5 milyard manat arasında artacağını bildirir. 

“Novoe Vremya” qəzeti rəsmi Bakının Ermənistan prezidentini təbrikə görə Türkiyə prezidentini tənqidə məruz qoymasına “Azərbaycanın bədxahları siyahısı tamamlanır... Türkiyə ilə” mövqeyi ifadə edib.      

“Bizim yol” qəzeti Ermənistan prezidentini təbrikə görə Türkiyə prezidentinin Milli Məclisdə tənqidlərə məruz qalmasını iki ölkə arasında münasibətlərin gərginləşməsi kimi dəyərləndirir.

Bir qrup tələbənin sosial şəbəkələr vasitəsilə tələbələri fevralın 27-də birgünlük “təhsili boykot” aksiyasına çağırışına cavab olaraq dekanların tələbələrə “həmin gün dərsə gəlməyən ağır cəza alacaq” hədə-qorxusu başlayıb. 

Sumqayıt polis idarəsi rəhbərliyi “univermaq Zaman” kimi tanınan sahibkarı idarəyə dəvət edərək icarədarların etiraz aksiyasına hazırlaşdıqlarını bildirib, ya icarə haqqını azaltmaq, ya da aksiya olduğu halda sahibkarın özünün də zərər çəkəcəyi xəbərdarlığı edib.  

“Yeni Müsavat” qəzeti rəsmi Kremlin nəzarətində olan Ləzgi Mədəni Muxtariyyətinin QMİ sədri Allahşükür Paşazadənin Qafqazda fəaliyyətinə son qoymağa çalışması xəbərini manjetə çıxarıb, bu addımı qəzet “Kremlin QMİ sədrinə hücumu” kimi dəyərləndirir. 

Əmək haqlarının azlığına görə işə çıxmaqdan imtina edən Şirvan neftçilərinin etiraz aksiyalarına hazırlaşdıqları bildirilir.