Mətbuat-Monitorinq 23.05.14

Rəsmi qəzetlər dövlət başçısı İlham Əliyevin qəbulları, ölkədə fəaliyyətə başlayan qida sənayesi və kənd təsərrüfatı sərgilərilə tanış olması xəbərlərini ilk səhifələrə yerləşdiriblər.

“Azadlıq” qəzeti bu günlərdə mətbuata  müsahibəsində rəsmi Bakını sərt tənqid edən ABŞ-ın Azərbaycandakı səfiri R.Morninqstarın tənqid olunmasına PA-nın rəhbəri R.Mehdiyevin də qoşulmasına diqqət çəkərək bunu “Əliyevin Mehdiyevi də səfirin üstünə qaldırması” kimi manjetə çıxarıb.

Metropoliten rəhbərliyi bu quruma aid binalarda ofis quran təşkilatlara, o cümlədən hökumətyönlü QHT Forumuna ofislərdən çıxmaları üçün bir həftə vaxt verib.

Ölkə prokurorluğu vəzifə səlahiyyətindən sui-istifadə və vəzifə saxtakarlığı ittihamı ilə jurnalist Aynur İmranlının bank hesabına həbs qoyub.

Qəzet iş adamı Hafiz Məmmədova məxsus “Bank of Azerbaycan”ın bu şəxsdən alındığını, bankın Müşahidə Şurasının sədrliyindən çıxarıldığını nəzərə çatdırır.  

Ölkəni tərk etmək şərtilə azad oluna bilməsi haqda rəsmi Bakının mesajına məhbus nazir Ə.İnsanov əfv ərizəsi yazmayacağı cavabını verib.

İlham Əliyevin sədri olduğu “Caspian European Club”in icraşı direktoru Telman Əliyev bir sıra nazirlərin istefaya göndəriləcəkləri anonsunu verib.

Ekspertlər “Dövlət sirri haqqında” qanuna gözlənilən dəyişiklikləri “jurnalistlərə qarşı repressiya küləyi” kimi dəyərləndiriblər.

“Ekspress” mətbuata müsahibəsində rəsmi Bakını tənqidə məruz qoyduğuna görə ABŞ səfiri R.Morninqstarın Azərbaycan XİN-ə çağırılması haqda xəbəri önə çəkib.

Qəzet “nurçuluq” təriqətini yaymaqda təqsirli bilinən Eldəniz Hacıyev və İsmayıl Məmmədovun barəsində cinayət işinin qaldırıldığını nəzərə çatdırır.

Hüquq müdafiəçisi Novella Cəfəroğlu həbsdə olan keçmiş nazir Əli İnsanovun barəsində əfv ərizəsini hüquq müdafiəçilərinin yazdığını bəyan edib.  

“Exo”. ABŞ və Azərbaycan arasında vergi ödəyicilərinin maliyyə hesabları haqda informasiyaların qarşılıqlı şəkildə mübadiləsi haqda razılıq əldə edilib.

“Novoe Vremya” “Caspian European Club”in icraçı direktoru Telman Əliyevin bəzi nazirlərin istefaya göndəriləcəyi haqda açıqlamasına “böyük təmizləmə gözlənilir?” mövqeyini ifadə edib.

“Bizim yol” ABŞ-ın Azərbaycandakı səfiri R.Morninqstarın bu yaxınlarda verdiyi müsahibədə rəsmi Bakını tənqidə məruz qoymasına PA-nın rəhbəri R.Mehdiyevin kəskin cavab verməsini lik səhifəyə çıxarıb.

Azərbaycanda vətəndaşlığa qəbul olmaq və vətəndaşlıqdan çıxmaqla bağlı qanunvericiliyin sərtləşdirilməsini ekspertlər “Rusiyadan milli təhlükəsizliyə gələn qorxularla” bağlı olduğunu bəyan edirlər.

 “Yeni Müsavat”  “nurçuluq”la bağlı istintaqın aparılması, deputat Ceyhun Osmanlının özünü xilas emək üçün “nurçu”ların Azərbaycan və Türkiyədəki fəaliyyətlərinə dair məlumatları istintaqa ötürməsi xəbərini ilk səhifəyə çəkib.  

Qəzet yazır ki, telefilmlərin çəkilişi üçün maliyyə vəsaitinin təyinatı üzrə xərclənmədiyiini iddia edən MTRŞ ANS-ə maliyyə vəsaiti ayırmaqdan imtina edib.

“Ayna-Zerkalo” qəzetlərinin redaktoru Elçin Şıxlı bu media qurumlarının fəaliyyətinin dayandırılmasını “görünür, cızığımdan çıxmışam” mövqeyi ilə ifadə edib.