AŞPA Bakıda Azərbaycana qarşı sanksiya tətbiq edib

AŞPA Bürosunun iclasının Azərbaycanda keçirilməsi rəsmi Bakı üçün xoşagəlməz vəziyyətlə nəticələnib. Belə ki, Büro 2 il ərzində AŞPA komitələrinin nəzərdə tutulan iclaslarının ləğvi barədə qərar qəbul edib. 2014-cü il iyunun 1-dən qüvvəyə minəcək bu qərar AŞPA-nın vitse-prezidenti, fransalı deputat Rene Rukeye AŞPA-nın Daimi Komitəsinin və Bürosunun iclaslarında iştirak etmək məqsədilə Bakıya gəlməsi üçün verilən vizanın Azərbaycan hakimiyyəti tərəfindən geri alınması ilə bağlıdır. 

AŞPA Bürosu hesab edir ki, vitse-prezidentə viza verilməsindən imtina edilməsi AŞPA üzvlərinin sərbəst hərəkət etmək toxunulmazlığı və üstünlükləri haqqında ümumi qaydaların və Paris protokolunun pozulmasıdır.

Məhdudiyyət seçkilərin monitorinqi üzrə AŞPA missiyasına şamil edilməyəcək.

Bununla yanaşı assambleya üzvlərinin sərbəst hərəkəti təmin edilərsə AŞPA bu qərarı ləğv etməyə hazırdır.

Bu qərar 2013-cü ilin noyabrında Gürcüstanla bağlı  qəbul olunmuşdu.

Xatırladaq ki, Rukeyə viza verilməsindən imtinaya səbəb onun rəsmi Bakının icazəsi olmadan Dağlıq Qarabağa səfər etməsilə bağlıdır. Ruke ermənipərəst mövqeyi ilə seçilir.

Lakin vaxtilə AŞPA Azərbaycanda siyasi məhbuslar üzrə məruzəçi Kristofer Ştrasserə viza verilməsindən imtina olunmasına reaksiya verməmişdi.

Digər tərəfdən, Krımın anneksiyası səbəbindən AŞPA 1 il müddətinə Rusiya nümayəndə heyətinin səlahiyyətini dayandırıb.

  Qarabağla əlaqədar AŞPA faktiki olaraq separatizmi təşviq edənlərin müdafiəsinə yönələn addım atıb.—06D--