Mətbuat-Monitorinq 23.10.15

Rəsmi qəzetlər dövlət başçısı İlham Əliyevin Dağıstan prezidenti Ramazan Abdulatipovu, Beynəlxalq Mülki Aviasiya Təşkilatının prezidentini qəbul etməsi xəbərləri, gömrük sahəsində bəzi yoxlamaların sadələşdirilməsi haqda fərmanın və leysan yağışları nəticəsində Lənkərana dəyən ziyanın aradan qaldırılması üçün 4 milyon manatın ayrılması haqda sərəncamın mətnlərini ilk səhifələrdə yerləşdiriblər.

“Azadlıq” qəzeti nəqliyyat naziri Ziya Məmmədov və MTN-in keçmiş şefi  Eldar Mahmudovun hakimiyyətin qəzəbinə gəlməsini görən “fövqəl nazir” Kəmaləddin Heydərovun da “təşviş”ə düşməsi iddiasını manjetə çəkib.

Qəzet MTN ətrafında baş verən hadisələrə dair analitik və insan haqlarının pozulmasi mövzusuna geniş yer verib.  

Qeyd edilir ki, “moderator.az” saytının rəhbəri Pərviz Həşimlinin həbsini də bu günlərdə MTN-də ifşa edilən dəstə həyata keçirib. MTN-dəki həbslərlə bağlı ölkə prokurorluğunun ictimaiyyətə dolğun informasiya verməməsini ekspertlər indiki halda ölkə prokurorluğunu insanlar üçün MTN-dən də təhlükəli qurum kimi dəyərləndiriblər. Rəsmi Bakının MTN rəhbərliyini sahibkarlara təzyiqlərə görə cəzalandırması mülahizəsini əsassız sayan ekspertlər eyni addımı bir çox digər nazirliklərin də atdığı, amma cəzasız qalmalarına diqqət çəkirlər. Bəzi ekspertlərə görə isə MTN-də bir qrup şəxsin həbsinə səbəb heç də sahibkarlara təzyiqlər yox, Beynəlxalq Bankdan götürülən kreditlərin müəyyən hissəsini “yuxarı”ların xəbəri olmadan mənimsəmələridir.

Yazarlar jurnalist Günel Mövluda təzyiqlər fonunda rəsmi Bakının valideynləri belə rejimə müxalif övladlardan imtinaya məcbur etməsini iqtidarın “37-ci illərin “ənənəsi”ni yaşatması kimi dəyərləndirirlər. AXCP sədri Əli Kərimli isə cəmiyyəti G.Mövluda dəstək olmağa çağırıb.

AXCP Gənclər Komitəsinn üzvü Türkel Azərtürk siyasi fəaliyyətinə görə ailəsi və özünün nalayiq şəkildə təzyiqlərə məruz qalması haqda açıqlama verib.

Dövlət başçısı İlham Əliyev dəyəri 10 min ABŞ dollarından artıq olmayan, kommersiya və istehsal məqsədi daşımayan malların gömrük sərhəddindən ödənişsiz keçirilməsi haqda fərman imzalayıb.

“Ekspress” sahibkarların MTN-çilərdən şikayətə başlamalarını ön plana çıxarıb.

“Bizim yol” keçmiş nazirlər Əvəz Ələkbərov və Əli Nağıyevin son hadisələrə dair MTN-lə bağlı mənfiyönlü açıqlamalarını ilk səhifəyə yerləşdiriblər.

Kommunal xidmətlərin yanvar ayından bahalaşacağı iddiası qoyan qəzet bu iddianı “bahalaşma qərarının yanvar ayından verilə biləcəyi” kimi dəyərləndirir. 

OPEC ölkələrinin neftin qiymətini qaldırmaq barədə razılığa gələ bilmədiklərini yazan qəzet faktı “neftin yenidən kəskin ucuzlaşması dövrünün başlaması” kimi şərh edir.

“Yeni Müsavat” bəzi rəsmi qurumların rəhbərlərinin fotosu fonunda həmin qurumların MTN-ə aylıq “haqq” verdikləri iddiasını ilk səhifəyə çıxarıb.

Qəzet MTN ətrafında baş verən hadisələr, insan hüquqlarının pozulması və s. mövzulara toxunub.  

MTN-in təzyiqlərə məruz qoyduğu iş adamları istintaq qrupuna şikayətlər verməyə başlayıblar. Keçmiş nazir və səfir Əli Nağıyev dövlətin “gözü və qulağı” sayılan MTN-də qanunazidd əməllərin üzə çıxmasına “deməli, dövlətin gözü və qulağı xarab imiş” şərhini verib. Ekspertlərə görə, nəqliyyat naziri Ziya Məmmədova təzyiqlərin səngiməsi iqtidarın seçki ərəfəsində MTN-lə yanaşı daha bir rəqib qüvvəyə malik olmamaq mövqeyilə bağlıdır.

Vicdan məhbusları Tofiq Yaqublu və İlqar Məmmədov ədalətli araşdırma olmayacağı üçün Şəki Apellyasiya Məhkəməsinə getməyəcəklərini bəyan ediblər.

Gədəbəy rayonundan bir qrup sahibkar rayon icra başçısı Ramiz Yediyarovun iş adamlarını həbslə hədələməsinə cavab olaraq Prezidenrt Administrasiyası önündə etiraz aksiyası keçiriblər.