SOCAR 2018-ci ildə NEZ-də yeni bitum qurğusu istismara verəcək

SOCAR 2018-ci ildə Heydər Əliyev adına NEZ-də yeni bitum qurğusu istismara verəcək, deyə şirkət məlumat verir.

Dünən SOCAR və Avstriyanın “Poerner” şirkəti arasında bitum qurğusu üzrə müqavilələrin imzalanma mərasimi keçirilib.

Təfsilat açıqlanmır. Tədbirdə R.Abdullayev çıxış edərək bildirib ki, Heydər Əliyev adına NEZ-in rekonstruksiya və modernizasiyası ilə bağlı işlər çərçivəsində qısa müddət ərzində zavodun illik emal gücünün artırılması və zavodda Avro-5 standartlarına cavab verən daha yüksək keyfiyyətli neft emalı məhsullarının istehsalı nəzərdə tutulur.

Bu məqsədlə zavodun ilkin emal, katalitik krekinq və katalitik reforminq qurğularının və ümumi-zavod təsərrüfatının rekonstruksiya edilməsi və bir neçə yeni qurğunun inşası planlaşdırılır. “Rekonstruksiya tədbirləri çərçivəsində zavodda ilkin olaraq 2018-ci ilin ortalarında yeni bitum istehsalı qurğusu istismara veriləcək. Bu tədbir keçmiş “Azərneftyağ” NEZ-in mövcud infrastrukturunun tamamilə istismardan çıxarılmasına, H.Əliyev adına NEZ-in istismar xərclərinin optimallaşdırılmasına imkan verəcək, yüksək keyfiyyətli bitum istehsalına və Bakı şəhərində ekoloji durumun yaxşılaşdırılmasına kömək edəcək», - deyə məlumatda qeyd edilir.

Əvvəllər SOCAR vitse-prezidenti Tofiq Qəhrəmanov bildirmişdi ki, "Pörner GmbH" Heydər Əliyev adına NEZ-də yeni bitum qurğusu layihəsi hazırlayır. O demişdi ki, şirkətlə 3 saziş imzalanacaq lisenziya, qarantiya və qurğunun layihələndirilməsi.

Qurğunun gücü ildə 400 min tona çatacaq.

Podratçı və layihənin idarəçisi ABŞ-ın Fluor Limited şirkətidir.

Əvvəlllər R.Abdullayevə istinadən bildirilmişdi ki, tikinti işləri 2015-ci ilin sonunda başlayacaq. Buna qədər “Azərneftyağ”da bitum istehsalı davam etdiriləcək. Yeni bitum qurğusu işə düşəndən sonra gücü 250 min ton olan mövcud qurğu söküləcək. –12D--