Mətbuat-monitorinq 24.07.15

Rəsmi qəzetlər dövlət başçısı İlham Əliyevin ATƏT-in Minsk qrupu həmsdərlərini qəbul etməsi haqda xəbəri, bəzi fərmanların mətnlərini ilk səhifələrdə yerləşdiriblər.

“Azadlıq” qəzeti siyasi xəbərlər blokunda Avropa Məhkəməsinin 2005-ci ilin martında qətlə yetirilən jurnalist Elmar Hüseynovun qətlini araşdırmağa başlamasını manjetə çıxarıb.

Bu blokda qəzet AXCP üzvü Asif Yusiflinin dələduz kimi mühakimə olunduğu məhkəmədə vəkilin alınan pulun borc olduğunu, borcun tam qaytarıldğını sübut etsə də prokurorun 8 il həbs istədiyini bildirir.

“Azərbaycan saatı” proqramının rəhbəri Qənimət Zahidin qohumlarının bu yayıma görə repressiyaya məruz qalmalarını siyasilər “hakimiyyətin rəqiblərinə qarşı mənəviyyata sığmayan formada apardığı mübarizə” kimi dəyərləndirirlər.

Bununla yanaşı, siyasi məhbus Tofiq Yaqublunun səhhətində ciddi problem yaranması da qəzetdə əksini tapır.

Avropaya qarşı antimövqe sərgiləyən rəsmi Bakının həm də Avropa İttifaqı ilə əməkdaşlığa hazır olması bəyanatını siyasilər “Rusiyanın indiki aqressiv halında Aİ ilə münasibətləri itirməyin hansı fəsadlar verə biləcəyinin fərqində olması” kimi şərh edirlər.

Qəzet dövlət başçısı İlham Əliyevin Nazirlər Kabinetinin sonuncu müşavirəsində verdiyi tapşırıqların yerinə yetirilməməsinə “onun dediklərini zarafat kimi qəbul edin” ironiyası ifadə edir.

İqtisadi xəbərlər blokunda Beynəlxalq Bankın borclarını dövlətin öz üzərinə götürməsi şərhçilərin “vətəndaşa güzəşt etməyən iqtidarın bankı özəlləşdirənlərə güzəşt etməsi” qınağına tuş gəlir.

Ekspert Vahid Məhərrəmli kənd təsərrüfatı sahəsində yenə də pərakəndiliyin, təsərrüfatsızlığın hökm sürdüyü bəyanatı səsləndirib.    

“Ekspress” qəzeti ABŞ diplomatı Riçard Hoqlandın Bakı səfərini “ABŞ-ın Bakı ilə əlaqələri istiləşdirməsi” kimi cəmiyyətə təqdim edir.

Qəzet eyni zamanda müdafiə naziri Zakir Həsənovun “Naxçıvandan İrəvanı istənilən anda darmadağın edərik” bəyanatına da önəm verərək diqqət mərkəzinə çəkib.

Qəzet yazır ki, ölkədə oğlan uşaqlarının doğumunun qız doğumlarını üstələməsinin fəsadları olacağını deyən ekspertlər “bunu taleyin ixtiyarına buraxmaq olmaz” bəyanatı səsləndiriblər.

“Exo” qəzeti ekspertlərin ölkə əhalisinin gəlirlərinin ancaq 25-30%-ni qidaya xərcləməsini “maaşın azlığı, ərzağın qiymətinin bahalığı” ilə izah etməsini önə çəkib.

Qəzet ölkə əhalisinin 10%-nin gəlirlərinin ən varlılardan 20 dəfə az olmasını, orta aylıq maaş 455 manat təkil etsə də, hələ də çoxlarının 200-400 manat arasında maaş aldığını nəzərə çatdırır.

“Bizim yol” qəzeti bir neçə ayda problemli kreditlərin həcminin artmasını ilk səhifəyə yerləşdirərək, bunu ictimaiyyətə bankların əhalidən yüz milyonları geri ala bilməməsi kimi təqdim edir.

Ölkə ekspertlərinə isnadən Neft Fondunun ehtiyatlarının 1.4 milyard manat azaldığını yazan qəzet Fondun vəsaitlərinin idarə olunmasından cəmi 241,9 milyon manat gəlir əldə edildiyini bildirir.

Bakının “Formula-1” yarışlarına hazırlaşdığını yazan qəzet təşkilatçıların böyük məsrəf tələb edən bu yarışmanın Azərbaycanın reklamı üçün lazım olduğunu iddia etdiklərini nəzərə çatdırılar.

“Yeni Müsavat” qəzeti ölkədə “islah olunmaz” məmur təbəqəsi yarandığı üçün öncə icra başçılarının, daha sonra “iri  fiqurların dəyişdirlməsi” prosesinin başlanacağı mülahizəsini ilk səhifəyə çıxarıb. 

Qəzetin iddiasına görə, İran-Qərb anlaşması Qərb üçün rəsmi Bakının önəmini azaltsa da, İsrail üçün əksinə, artırıb.

Bu sırada qəzet Avropaya tənqidi mövqe tutan rəsmi Bakının Avropa ilə yenidən yaxınlaşmasını “Qarabağ məsələsi üçün təzə şərt yetişə bilməsi” ilə əlaqələndirir.

Rəsmi Bakı-Avropa münasibətlərinə toxunan hökumətyanlı “ekspertlər” Avropanın “bəzi şərtləri qəbul edəcəyini" desə də, müstəqil ekspertlər mövcud durumun hələ dəyişməyəcəyini proqnozlaşdırırlar.

Rəsmi Bakının internet resurslarını nəzarətə götürmək istəyini hakimiyyətə yaxın media mənsubları “inernet resurslar da dövlətdən yardım ala bilər” mesajı şəklində cəmiyyətə ötürürlər.

Dünənə qədər “radikal” müxalifət düşərgəsində olan “Yeni Müsavat” qəzeti bu gün “bu düşərgənin tənəzzül dövrü yaşaması, xalqın könə liderləri qəbul etməməsi, yeni simaya ehtiyac yaranması” “əllaməliyi” edir.

AXC hakimiyyətinin daxili işlər naziri İskgəndər Həmidovun mülahizəsinə görə, sən demə, ölkə müxalifətini 20 il ayaq üstdə “Yeni Müsavat” qəzeti saxlayıbmış...