A.Paşazadə: Ekstremizmə qarşı bütün səmavi din ardıcılları birləşməlidir

Qafqaz Müsəlmanları İdarəsi (QMİ) idarənin sədri, şeyxülislam Allahşükür Paşazadənin Tacikistan səfərinin nəticələrinə dair məlumat yayıb.

Səfər iyulun 21-23-ü arasında davam edib. A.Paşazadə iyulun 22-də “İslam dini ekstremizm və terrorizmə qarşı” beynəlxalq konfransda məruzə ilə çıxış edib. 

QMİ sədri konfransın ümumbəşəri əhəmiyyətə malik məsələyə həsr olunduğunu vurğulayıb. Terror aktlarını, təkfirçiliyi pisləyən A.Paşazadə belə əməlləri xalqların iradəsi, dövlətlərin məsuliyyətli qərarları, din xadimləri və cəmiyyətin bütün təbəqələrinin birgə səylərilə önləməyin mümkün olduğunu bildirib. Bununla yanaşı, QMİ sədri bu yolda dini maarifləndirmənin də rolu olduğunu nəzərə çatdırıb.

Daha sonra A.Paşazadə tədbir iştirakçılarının diqqətini 25 ildir ki, davam edən Qarabağ münaqişəsinə yönəldib. Bu mənada Azərbaycan xalqının terror və ekstremizmin nə olduğunu yaxşı bildiyi xatırladılıb.

Şeyxülislam A.Paşazadə ekstremizmlə, terrorla, ideoloji təxribatlarla mübarizədə islami həmrəyliklə yanaşı digər səmavi din ardıcıllarının dialoq qurmalarını və əməkdaşlıq etmələrini bu sahədə təsirli vasitə adlandırıb. Son olaraq, A.Paşazadə qəbul ediləcək qərarlarla bağlı təklif və tövsiyyələrini verib.

QMİ sədri bu yaxınlarda Tacikistanda baş verən təbii fəlakətlə bağlı tacik xalqına, rəhbərliyinə, yaxınlarını itirən ailələrə başsağlığı verib, fəlakətdən zərər çəkmiş ailələrə Azərbaycan müsəlmanları adından 10 min ABŞ dolları məbləğində maddi yardım edib. -05D-