Mətbuat-Monitorinq 25.08.14

Rəsmi qəzetlər dövlət başçısı İlham Əliyevin Binə qəsəbəsindəki 121 saylı orta məktəbin təmirdən sonrakı durumu ilə tanış olması, Ukraynanın  müstəqilliyi günü ilə bağlı Ukrayna prezidenti Pyotr Poroşenkoya təbrik ünvanlaması xəbərlərini ilk səhifələrdə yerlşdiriblər.

“Azadlıq” qəzeti Ərdoğanın Bakıya gözlənilən səfərini önə çəkərək “Ərdoğan Bakıya nurçu məsələsinə son qoymaq üçün gəlir” mövqeyini ifadə edir.

Bir müddət öncə AXCP-yə icarə verdiyinə görə partladılan və dağıdılan mülkün sahibi Azər Əsgərov hakimiyyəti sərt tənqid etdiyinə görə avqustun 24-də saxlanılıb, onun barəsində məhkəmə yolu ilə inzibati həbs qərarı çıxarmaq istəyirlər.

Maşın oğurluğuna görə saxlanılan Xaçmaz rayon sakini Səbayel Rayon Polis İdarəsinin 4-cü mərtəbəsindən özünü ataraq intihar edib.

Hüquq müdafiəçisi İlqar Nəsibovun vəhşicəsinə döyülməsinə Böyük Britaniya dövləti, bəzi beynəlxalq qurumlar etiraz ediblər, Freedom House təşkilatı Azərbaycana qarşı sanksiyalara çağırıb.

Hüquq müdafiəçisi İlqar Nəsibovun “məişət mübahiəsi” zəminində döyülməsi haqda Naxçıvan DİN-in açıqlamasını xanımı Məlahət Nəsibova böhtan adlandırıb.

Vətəndaş Həmrəyliyi Partiyası İ.Nəsibova hücum edənlərdən Fərid Əsgərovun   VHP Naxçıvan təşkilatının sədri olması haqda Naxçıvan DİN-in bəyanatını yalan adlandırıb və nazirliyin partiyadan üzr istəməsini tələb edib.    

İnsan hüquqları uğrunda mübarizənin beynəlxalq fəalları Azərbaycanda durumun “dözülməz” olduğunu deyərək “qanunun işləmədiyi ölkədə hökuməti ədalətli məhkəməyə çağırmağın məntiqə sığmadığını” bəyan ediblər.

Rusiya demokratlarından Boris Nemtsov İlham Əliyevi “Putindən ən pis repressiya növlərini örnək götürməkdə” ittiham edib.

Ölkədə korrupsiyanın olduğunu inkar edən deputat Səməd Seyidovun rektoru olduğu universitetdə prorektor və daha 4 əməkdaşın cinayət işi yekunlaşıb.

Ordu haqqında yanlış yazan mətbuat orqanlarının cəzalandırılması haqda qanun təklifini ekspertlər hökumətin ordudan yazan jurnalistləri cəzalandırmaq cəhdi kimi dəyərləndiriblər, qanun layihəsini absurd adlandırıblar.

“Yeni Müsavat”  “Azərbaycanın nə Qərb, nə Rusiya” seçimi etdiyini önə verərək bunu “Azərbaycan “üçüncü yol” astanasında” kimi təqdim edir.

Ailə üzvlərinin cəhdlərinə baxmayaraq, həbsdə olan bloger Orxan Əyyubzadəyə son bir ayda ailəsilə görüş verilməyib.

Naxçıvanda vəhşicəsinə döyülən hüquq müdafiəçisi İlqar Nəsibovin xanımı Məlahət Nəsibova ərinin döyülməsinə səbəb kimi bir neçə il öncə Naxçıvan MTN-də müəmmalı şəkildə ölən Turac Zeynalovun işilə bağlı Avropa Məhkəməsində kommunikasiyanın başlamasını göstərib.