Mətbuat-Monitorinq 25.08.15

Rəsmi qəzetlər dövlət başçısı İlham Əliyevin Sabirabad rayonunun Nizami-Əliləmbəyli-Azadkənd-Sarxanbəyli avtomobil yolunun tikintisilə bağlı 1 milyon 500 min manatın ayrılması haqda sərəncamını ilk səhifələrdə yerləşdiriblər.

“Azadlıq” qəzeti Israilin Azərbaycan neftini almaqdan imtina etməsini “Azərbaycana daha bir zərbə” kimi manjetə çıxarıb.

Beynəlxalq Bankla bağlı kredit həbsləri dalğası bankın keçmiş rəhbəri Cahangir Hacıyevin yaxınlarına da çatıb və bacanağı İsmayıl Tağızadə həbs olunub.

Qəzet əhalinin alıcılıq qabiliyyətinin enməsilə bağlı paytaxtın mərkəzi küçələrindəki mağazaların kütləvi şəkildə bağlanmağa başladığını iddia edir.

Tələbə adını qazananların bir çoxu təhsil haqqı ödənişinə görə təhsili davam etdirə bilmir, bununla bağlı TQDK qeydiyyatı uzatmağa məcbur olub.

Qəzet bir qrup keçmiş AXCP-çinin əli ilə partiyaya iqtidarın hücumunu “narazı elektoratın başında dura biləcək qüvvəni sıradan çıxarmaq” səyi adlandırır.   

Mühakimə altında olan jurnalist Xədicə İsmayıl “Yeni Müsavat” qəzetini onun  barəsində təhriflə yazdığı üçün “Səs” qəzetilə eyniləşdirib.

Ölkədə növbəti devalvasiyanın olacağını təxmin edən ekspertlər bu dəfə devalvasiyanın 20-25%  arasında olacağını bildirirlər.

Ezamiyyət xərclərilə bağlı vəsaitlər təyinatı üzrə işlədilmədiyi üçün PA-nın rəhbəri Ramiz Mehdiyev büdcə qurumlarına ezamiyyətləri məhdudlaşdırmağı tapşırıb.

“Ekspress” Müdafiə Nazirliyinin “Azərbaycan torpaqlarında hərəkət edən düşmən hərbçisinin istənilən yolla məhv edilməsi bəyanatını” önə çəkib.

Ekspertlər ölkənin ticarət sistemində satılan duz məhsullarının təmizlənmədən satılmasını orqanizmə zərərli adlandırıblar.

“Novoe Vremya” bir müddət neftin bazarda baha qiymətə satılması ilə dirçələn iqtisadiyyatın elə neftin qyimətinin enməsilə çökməsinə “Azərbaycanın neft lənəti” kimi yanaşmasını diqqət mərkəzinə çəkib.  

Ölkənin polis bölmələrində, həbsxanalarında baş verən zorakı ölümlərlə bağlı məmurların cəzalandırılmamasına qəzet “məmurlar nə zaman məsuliyyət daşıyacaqlar?” sualını ünvanlayır.  

“Bizim yol” Beynəlxalq Banka kredit borcuna görə bankın keçmiş rəhbəri Cahangir Hacıyevin qohumunun həbsini ilk səhifədə yerləşdirib.

Rəsmi Bakı BMT-nin bir qrup ekspertinin insan haqlarının ağır durumu ilə bağlı Azərbaycanı tənqiud etməsini ənənəvi olaraq “əsassız və qeyri-obyektiv” adlandırıb.

Qəzet “dollar ajiotajı” başlanan son iki gündə 370 milyon dolların satıldığını nəzərə çatdırır.

Qəzet Azərbaycanda xərçəng xəstəliyinin cavanlaşdığını yazaraq hər il bu xəstəlikdən ölkədə 7 min nəfərin dünyasını dəyişdiyini bldirir.

“Yeni Müsavat” Qarabağ cəbhəsində topların işə düşdüyünü, düşmən tərəfin ağır itki verməsi haqda rəsmi xəbəri ilk səhifəyə çıxarıb.

İşgəncələr Əleyhinə Komitənin sədri Elçin Behbudov Mingəçevir şəhər sakini Bəhruz Hacıyevin şəhər polis şöbəsində elektroşok nəticəsində ölməsini araşdıracağını bildirib.

Keçən ilin dekabrında 14 saylı həbsxanada qətlə yetirilmiş məhkum Elşad Babayevin qətlilə bağlı cinayətə xitam verilib, məhkumun yaxınları ədalətli araşdırma tələb edirlər.

Siyasi partiya rəhbərləri ölkədəki “dollar ajiotajı”nın parlament seçkiləri bitənə kimi ciddi qiymət artımına səbəb olmayacağını, seçkilərdən sonra isə ciddi qiymət artımının olacağını bəyan edirlər.

Ekspertlər Mərkəzi Bankın valyuta ehtiyatları azaldığı üçün manevr imkanlarının məhdudlaşdığını, devalvasiyaya getmək məcburiyyətində qaldığını bəyan edirlər.

Qəzet Beynəlxalq Banka kredit borcuna görə bankın keçmiş rəhbəri Cahangir Hacıyevin bacanağınını həbsini “həbsin qohumlara çatması” adlandırır.