Mətbuat-Monitorinq 26.11.15

Rəsmi qəzetlər dövlət başçısı İlham Əliyevin Latviyanın iqtisadiyyat nazirini və İSESCO-nun baş direktorunu qəbul etməsi haqda xəbərləri və bəzi sərəncamların mətnlərini ilk səhifələrdə yerləşdiriblər. 

“Azadlıq” qəzeti “MTN işi” ilə bağlı bu quruma aid generalların himayədarlıq adı ilə Rabitə Nazirliyinin vəzifəli şəxslərindən haqq almalarını manjetə çxarıb. 

İş adamları onlara qənim kəsilən MTN-dəki quldur dəstəsinin ifşasından sonra bu dəstənin onlara qarşı cinayətləri haqda mətbuata açlıqlamalar verməkdə davam edirlər. “MTN işi” ilə bağlı yeni həbslər dalğasının başladığını yazan qəzet bələdiyyə sədrlərinin istintaqa cəlb edildiklərini nəzərə çatdırır.

Qəzet Naxçıvanda həbs edilən AXCP üzvlərinə işgəncə verildiyini və yaxınlarının onlar haqda məlumat ala bilmədiklərini yazır.

Həyat yoldaşı şərlənərək həbs edillən Bakı sakini Sevda Süleymanova polisdən şikayətlər yazdğına görə Bakı şəhər polisi tərəfindən təqiblərə məruz qaldığını bildirir.

Ekspertlər dərmanların qiymətlərinin tənzimlənməsindən sonra əksər dərmanların apteklərdə tapılmadığını, bəzlərinin isə 30% bahalaşdığını bildirirlər.

Türkiyə tərəfin Rusiya təyyarəsini vurmasına münasibətdə rəsmi Bakının Türkiyəni müdafiə etməməsini “doğma qardaşa ögey münasibət” kimi dəyərləndirir. Eyni zamanda bu məsələ ilə bağlı bəzi şəxslərin Türkiyənin Rusiyadan üzr istəməsi,

YAP-ın Ankaranı günahkar sayması mövqelərinə qəzet “Bakıdan rüsvayçı açıqlamalar” yanaşmasını ifadə edir.   

Ekspertlər Türkiyənin Rusiya hərbi təyyarəsini vurmasından sonrakı vəziyyəti  “hər iki tərəfin savaşın bir addımlığında olması” kimi qiymətləndirir.

Qəzet dövlət başçısı İlham Əliyevin yeni parlamentin ilk iclasında ölkədəki inkişaf haqda danışmasını “yalan təbliğatı”nın davam etməsi adlandırır.

“Ekspress”  “MTN işi” ilə bağlı 19 nəfərin həbsə alınması, 1 nəfərin axtarışda olması haqda ölkə prokurorluğunun açıqlamasındakı xəbəri diqqət mərkəzinə çəkib.

Rusiya hərbi təyyarəsi Türkiyənin hava məkanını pozduğu üçün vurulması haqda rəsmi Ankaranın açıqlamasına baxmayaraq, deputat Məlahət İbrahimqızı buna “Rusiya-Türkiyə münasibətlərin pozmaq istəyənlər”in olması kimi yanaşır.

“Novoe Vremya” Rusiya-Türkiyə arasındakı gərgin münasibətlə bağlı “Bakı heç də sadə olmayan vəziyyətə düşüb” mövqeyini önə çəkib.

“Bizim yol”  “MTN işi” ilə bağlı ifşa edilən dəstənin 19 üzvünün həbsdə olmasını ilk səhifəyə yerləşdirib.

Qəzet Əmlak Komitəsində qurumun inzibati binasının tikintisinə və Türkiyədəki anonim şirkətlərə 136 milyon manat pulun xərcləndiyi və ötürüldüyünü bildirir.

“Yeni Müsavat” Rabitə Nazirliyinə 38 yaşlı Ramin Quluzadənin nazirin birinci müavini təyinatını “iqtidar komandasına gənclərin gəlməsi” kimi ilk səhifəyə çıxarıb.

MTN-də həbslərin başlamasından bir aydan çox vaxtın keçməsinə baxmayaraq, ölkə prokurorluğu yalnız bu günlərdə bu həbslərin mahiyyəti haqda açıqlama yayıb. Açıqlamaya görə 19 nəfər yüksək rütbəli şəxs həbs edilib, 1 nəfər qaçıb, 1 nəfər isə ev dustağı edilib.

Qəzet ekspertlərə isnadən bu ilin fevralında manatın devalvasiyasına səbəb kimi MTN-in və Beynəlxalq Bankın keçmiş başçıları Eldar Mahmudov və Cahangir Hacıyevin maliyyə maxinasiyalarını göstərir.