Türkiyə haqlı

Türkmənlər müdaifə edilməməlidirmi?

Azərbaycanda diniyönlü bir sıra İnternet resursları açıq-aydın antitürk mövqeyi sərgiləyirlər. Səbəb də budur ki, Türkiyə qırıcıları niyə Rusiyaya aid bombardmançı təyyarəni vurub?. Amma Rusiya təyyarəsinin vurulması bir kənarda qalır, Türkiyə terrorçu qrupları dəstəkləməkdə ittiham edilir.  

Bu xəbər resurslarını hansısa xarici qüvvələrə bağlamaq istəməzdim, amma bütün mahiyyətilə Azərbaycana yad olan xəttin görünməsi ortadadır. Bu, elə də çox diqqət tələb etmir.

İraq və Suriyada türkmənlərin yaşaması faktdır. Bu türkmənlər zamanında İraqda Səddam Hüseyn, Suriyada Hafiz Əsəd, indi də müxtəlif terrorçu qrupların əzab-əziyyətinə məruz qalır. Bir-birinə qənim kəsilən ərəb terror qrupları ilə ərəb siyasi rejimləri arasındakı qırğında türk olanlar həyatlarından, mal və canlarından olurlar. Adı çəkilən regionda hamının arxasında bir güc dayandığı halda türkmənlərin arxasında heç kim yoxdur.

Türkiyə 2003-cü ildə İraq məsələsi həll ediləndə türkmənləri arxasız qoydu, ona görə də kürd silahlıları birinci zərbələrini türkmənlərə endirdilər. Türkmənlərin neçə-neçə say-seçmə başbilənləri güllələndi. O zaman nədənsə kiçik bir qrup istisna olmaqla heç kəs səsini çıxarmadı.     

Suriyada da Türkiyə türkmənlərə münasibətdə uzun müddət səssiz qaldı. Ancaq son bir neçə ayda başa düşəndə ki, Suriyadakı türkmənlərin yaşadıqları ərazilər İŞİD-in əlinə keçsə terror Türkiyə ilə birbaşa “təmas”a çıxır, o zaman türkmənlər əziz oldular. Yəni, Türkiyə türkmənlərə münasibətdə indi atdığı yox, atmaq istədiyi addımı bir neçə il öncə atmalı idi. Türkmənlərin yaşadığı Bayırbucaq bölgəsində  İŞİD yoxdur, olmayıb, heç zaman da ola bilməyəck. Xarici kəşfiyyatların öz maraqlarından irəli gələrək Türkiyənin terrorçu qrupları dəstəkləməsi haqda ötürdükləri informasiyalar isə konkret xarici dövlətlərin siyasi maraqlarına, Türkiyə ilə türk dövlətləri və toplumları arasında soyuqluq yaratmağa hesablanan informasiyalardır. İndiki halda Türkiyə bütün gücü ilə istər Suriyada, istər İraqda eyni soydan olan türkmənləri qoruma altına almalıdır. Bu, ən düzgün addım olardı.

Rəsmi Kremlin böhtanlarını təkrar

Hazırda bəzi saytların Türkiyənin Suriyada terrorçulardan neft alması, türkmən adı altında terrorçuları himayə etməsi kimi böhtanları elə rəsmi Kremlin dedikləridir. Nə zamandan müsəlman olan müsəlman olmayanın sözünü digər müsəlman qardaşa qaxınc edir? Yoxsa, maraq davası hətta düşmən sözünü belə din birliyindən irəli keçirir? Bu saytlarda məlum yazıları oxuyarkən istər-istəməz haqqında danışdığımız xətt özünü qabarıq göstərir. Görünür, bəzi saytlar kimlərinsə maraq dərinliyində batdıqlarına görə, bütün islam dininin necə batdığının şahidi ola bilmirlər. Obrazlı desək, əgər gəmi batırsa, onun bir hissəsi batıb, bir hissəsinin suyun üstündə qalması mümkün deyil. Bir ucu Tunisdən Pakistana qədər islam zolağında xaosdur. Vaxtilə bəzi güclərin yaratdıqları qum sərhədli “ərəb dövlətləri”nin sərhədləri dəyişdirilir. Ərəb dünyası ərəb dövlətlərinə sahib çıxa bilmir. Çünki ərəbdə dövlət anlayışı heç zaman olmayıb, indi də yoxdur. XXI əsrdə, islam dinin yayılmasından 15 əsr keçsə də ərəb hələ də kimin əsl müsəlman olub-olmamasını araşdırır. Çünki cahillik ən böyük bədbəxtlikdir. Həmin cahillik islamın ərəb dünyası hissəsi üzərindən hələ də götürülməyib.

Amma islama olan zərbələr haqda danışan yoxdur, islamı niyə bu günə qoydunuz sualını verən yoxdur. Tunis hadisələrindən üzü bu yana hələ bir dəfə də olsun islam aləmi bir yerə yığılaraq islamı qorumaq barədə bir dəfə də olsun ortaya iradə qoymadı.

Türkiyə terrorun nə olduğunu bilir

Türkiyə 30 ildən yuxarıdır ki, PKK terrorundan əziyyət çəkir, şəhidlər verir. Odur ki, cahan dövləti olan Türkiyənin terrora dəstək verməsi haqda xəbərlər daha çox Rusiya və İran təbliğat maşınının xəttinə oxşayır. Özü də kürd terror qruplarının Türkiyəyə qarşı döyüş aparmasında Rusiya da, İran da, hətta Tütkiyənin müttəfiq saydığı güclər də maraqlıdır. Terrorçuları bəsləyib böyüdən Rusiyanın indi terrora qarşı mübarizə aparması inandırıcı görünmür. Üstəlik bu iki dövləti Suriyada birləşdirən Bəşər Əsəd rejimini müdafiə etmək yox, məhz B.Əsəd varlığında birləşən maraqlarıdır. Əgər İran, Rusiya B.Əsəd devrildikdən sonra hakimiyyətə gələcək qüvvənin onların marağını təmin edəcəyini bilsələr, günü bu gün B.Əsədi qurban verərlər. Amma hər iki dövlət məlum olan bu günü qeyri-müəyyən gələcəyə dəyişmək istəmirlər. Amma əvvəl-axır son söz dünən və bu günün yox, gələcəyindir.  

İran Suriyada rejim dəyişməsilə ona rəqib ola biləcək bir qüvvənin hakimyyətə gəlməsindən qorxur. Rusiya isə B.Əsəd devrilməklə ərəb dünyasi daxilində “tanıdığı” son qüvvəni itirir və beləliklə, Yaxın Şərqdən gedir. Necə deyərlər, hər iki dövləti öz aqibəti düşündürür. Amma bər-bəzəkli görünsün deyə bu dövlətlər “terrora qarşı mübarizə” adı ilə Suriyada birləşirlər. Terrora qarşı vuruşan dövlət vaxtilə Əfqanıstanı qana boyamazdı.

Türkiyəni terrora qarşı var gücülə mübarizə aparmamaqda, silahlı münaqişələr zonasında yerləşən türksoyluları yetərincə müdafiə etməməkdə ittiham etmək olar, amma Türkiyəni terroru dəstəkləməkdə ittiham etmək sadəcə yaramazlıqdır.

Bu nə işbirliyidir?

Görün, xrisitan Rusiyası ilə islam İranı harada birləşir? Siyasi maraqda. Yenə təkrar edirik ki, “islam coğrafi arealı” xaos içindədir, bu fakt heç bir müsəlman dövlətini düşündürmür. Fələstindən başlanan “islam faciəsi”nə görə, bütün islam dövlətlərinin nə zamansa qətiyyətini gördünüzmü? Yox. Olsaydı, bilərdik. Yer bərk, güc az, düşmən güclü, qarşılıqlı etimad yox. Nə qalır? Bir-birimizi ittiham etmək, vəssəlam.

Rusiya terrora qarşı vuruşmur, güc nümayiş etdirir

Rusiya təyyarəsinin vurulmasına gəlincə, burada Türkiyə tam haqlıdır. Hansı dövlət, hansı qüvvə olursa-olsun icazə olmadan evinə girə bilməz. Ona görə də Rusiya tərəf “mənəm-mənəmlik” ambisiyasından əl çəkməlidir. İŞİD-lə vuruşursa, həmin qüvvə ilə vuruşsun. Daha İŞİD-lə heç bir əlaqəsi olmayan türkmənləri qırmasın. Rusiya tərəf İŞİD-i vurmaq üçün koordinatları belə bilmir. Ona görə də əməliyyat, terrora qarşı mübarizə adı ilə gah Xəzərdən, gah Aralıq dənizindən hədəfi bəlli olmayan raketlər buraxır, gah bombardmançı təyyarələri türkmənləri hədəfə alır. Bütün bu deyilənlər göstərir ki, Rusiya hərbi əməliyyat aparmır, sadəcə hərbi güc nümayiş etdirir və ya loru şəkildə desək “mən də varam” söyləyir.         

Yeri gəlmişkən, bu hadisəyə görə Azərbaycanda bəzi tanınmışların Türkiyənin Rusiyadan üzr istəməsi tələblərini anlaya bilmirik. Rusiya 1990-cı il qırğınlarına, Qarabağın işğalına görə Azərbaycandan, bu yaxınlarda Ulrayna səmasında 324 nəfərin qətlinə səbəb olan mülki təyyarəni vurmağına görə dünya bilriyindən üzr istədi? Türkiyənin üzr istəməsini gündəmə gətirənlər haqqa yox, zora səcdə edənlərdir.

Bunu necə başa düşək? Dövlət özünü qoruyub, düşmənə zərbə endirib. Bu qədər.

Həm də Türkiyə son vaxtlar Pribaltikadan Yaxın Şərqə qədərki arealda öz ölçülüb-biçilməmiş addımları ilə dünya birliyinə meydan oxuyan Rusiyaya kimin kim olduğunu anladıb. Türkə, türklüyə, insanlığa layiq şəkildə.