Mətbuat-Monitorinq 27.11.15

Rəsmi qəzetlər dövlət başçısı İlham Əliyevin İSESCO Baş Konfransının XII sessiyasının açılışında iştirakı və çıxışını ilk səhifələrdə yerləşdiriblər.

Polisin Nardaranda keçirdiyi və kütləvi ölümlə müşayiət edilən əməliyyatla bağlı Daxili İşlər Nazilriyi və ölkə prokurorluğu birgə məlumat yayıb.

“Azərbaycan” qəzeti hadisəyə “radikal ekstremistlərin zərərləşdirilməsi” mövqeyini ifadə edib.

“Xalq qəzeti”ndə isə bu hadisə “din pərdəsi altında fəaliyyət göstərən radikal ekstremistlərin ifşa olunması” kimi dəyərləndirilir. İctimaiyyət adından hüquq-mühafizə orqanlarından “qanlı hadisəni törədənlərin ciddi cəzalandırılması” tələbi ortaya qoyulur.

Bu qəzetlərdə Qafqaz Müsəlmanları İdarəsinin bu hadisəni pisləyən bəyanatı da yer alıb.

“Azadlıq” qəzeti polisin Bakının Nardaran qəsəbəsində ilahiyyatçı Tale Bağırzadəni saxlamaq məqsədilə apardığı qanlı əməliyyat haqda xəbəri manjetə çıxarıb.

AXCP sədri Əli Kərimli hökuməti Nardaranda kütləvi ölümə səbəb olan əməliyyat keçirməyə hansı zərurətin olması haqda izahat verməyə çağırıb.

Hüquq müdafiəçilərinə qarşı təqibləri dayandırmağa çağıran BMT-nin hüquq müdafiəçilərinin qorunması ilə bağlı qəbul etdiyi qətnaməyə Azərbaycan səs verməyib.

Qəzet Tubb Universitetinin tələbəsi, 1993-cü ildə anadan olan Türkan Həsənzadənin intihar etmədiyini bildirir.

AzAL prezidenti Cahangir Əsgərovun bacanağı Bəxtiyar Əliyev psixotrop maddələr satdığına görə həbs edilib.   

Rusiya hərbi təyyarəsini vurduğuna görə Azərbaycanda bəzi şəxslərin Türkiyənin Rusiyadan üzr istəməsi tələblərinə ölkə siyasiləri “bu qədər nankorluq olar?” mövqeyini ifadə ediblər.

İşğalda olan torpaqları azad edə bilməməsinə baxmayaraq, rəsmi Bakının hərbi büdcənin çoxluğu ilə öyünməsini ekspertlər “hökumətin şəxsi maraqlarına xidmət edən təbliğat” adlandırıblar.      

“Ekspress” Nardaranda polisin keçirdiyi əməliyyatı “cinayətkar dəstənin məhv edilməsi” kimi diqqət mərkəzinə çəkir.

Qəzet gərginləşən Rusiya-Türkiyə münasibətləri fonunda türk turistlərin Rusiyaya buraxılmaması, Rusiyada tikinti sektorunda çalışan türklərin miqrasiya haqqında qanun pozuntları adı ilə məsuliyyətə cəlb olunduqları haqda yazır.

“Exo”  erkən nikahlara toxunaraq ekspertlərin buna görə məsuliyyətin qanunları rədd edən din xadimlərinin üzərində qalması iddiasını ön plana çıxarıb.

“Novoe Vremya” polisin Nardaranda kütləvi ölümlə müşayiət edilən əməliyyat keçirməsini “Nardaranda yenə də narahatlıq olması” mövqeyi ilə təqdim edir.

“Bizim yol” Nardaranda polisin keçirdiyi əməliyyatı “silahlı qrupun polislə atışması” adı ilə ilk səhifədə yerləşdirib.

Qəzet Nardaranda polisin keçirdiyi əməliyyat zamanı yaralanan və 3 saylı xəstəxanaya yerləşdirilən yaralılara yaxınları ilə görüş verilmədiyini bildirir.      

Qəzet QHT-lərə Dövlət Şurasına isnadən müqavilə öhdəliklərini pozan 89 QHT-dən 135 min 843 manat vəsait tutulduğunu yazır.

Ölkədə hər gün evini, əmlakını itirən, həbs təhlükəsilə üzləşən vətəndaşların sayının artmaqda olduğunu yazan qəzet bunu bankların bahalı kreditlərinin Azərbaycanda dəhşətli mənzərə yaratması” kimi dəyərləndirir.

“Yeni Müsavat”  MTN-in keçmiş şefi Eldar Mahmudovun yaxın dostu,  deputat mandatı ləğv edilən “Azəriqazbank”ın rəhbəri Çingiz Əsədullayevin ölkədən qaçmaq istəməsi iddiasını ilk səhifəyə çəkib.

Qəzet Nardaranda polisin kütləvi ölümlə müşayiət edilən əməliyyat keçirməsini “Nardaranda bir qrup radikallara qarşı əməliyyat” kimi dəyərləndirir.

Rusiya-Türkiyə münasibətlərinin indiki durumuna şərh verən keçmiş səfir, politoloq Hikmət Hacızadə “Azərbaycan Türkiyənin yanında olmalıdır” mövqeyini səsləndirib.

Türkiyənin Rusiya hərbi təyyarəsini vurması haqda yazan qəzet buna cavab olaraq Qarabağ torpaqlarının Ermənistana verilə bilməsini nəzərə çatdırır.

Suriyada döyüşdüklərinə görə oktyabrın 19-da gecə əslən Xaçmazdan olan 10 nəfər həbsə alınıb.

Ədliyyə Nazirlyinin qəzetləri iki ay bağlamaq hüququna malik olmasını ekspertlər “media azadlığını məhdudlaşdırmaq üçün nəzərdə tutulan formul” kimi dəyərləndiriblər.