Mətbuat-Monitorinq 28.10.15

Rəsmi qəzetlər dövlət başçısı İlham Əliyevin Monteneqronun baş nazirinin başçılıq etdiyi nümayəndə heyətini qəbul etməsi haqda xəbəri, “Azərbaycan İpoteka Fondu” ASC-nin yaradılması haqda fərmanın mətnini ilk səhifələrdə yerləşdiriblər.

“Azadlıq” qəzeti MTN-in keçmiş şefi Eldar Mahmudovun villalarını mühafizə etmək üçün MTN-də xüsusi idarənin yaratması iddiasını manjetə çıxarıb.

Ölkə vəkilləri Avropa məhkəməsinin qərarları icra olunmadığına görə Azərbaycana sanksiyaların tətbiq oluna biləcəyi barədə xəbərdarlıq edirlər.

“MTN işi” ilə bağlı üzə çıxan rüsvayçı faktlara hüquqşünaslar “istənilən nazirlik yoxlanılsa MTN-dən daha çox nöqsanlar aşkarlanar” rəyini veriblər.

AŞPA İnsan Haqları Komitəsi Azərbaycandakı seçki mühitinə “ölkə vətəndaşları hökumətin yaratdığı sükutdan daha çox əziyyət çəkəcəklər” mövqeyini ifadə edib.

Qərbin demokratiya tələbləri fonunda rəsmi Bakının rus jurnalistlərə “Azərbaycan anti-Rusiya sanksiyalara qoşulmadığı üçün təzyiqlərə məruz qalır” bəyanatını qəzet  “oyuncaq siyasətin davam etməsi” kimi qiymətləndirir.

Əhalinin alıcılıq qabiliyyətinin, tikinti sektorunda satışın azalmasını qeyd edən ekspertlər faktı “daşınmaz əmlak bazarının tənəzzülü” kimi dəyərləndirirlər.  

Türkiyədə CHP-dən olan deputat Aykut Ərdoğdu SOCAR və rəsmi Ankaranı bağladıqları qaz sazişilə Türkiyəyə külli miqdarda ziyan vurmaqda ittiham edib.   

“Ekspress”  “MTN işi” ilə bağlı həbslərin artmasını bu işin dərinləşməsi kimi diqqət mərkəzinə çəkir.

Avropa qurumlarının demokratiyanın durumuna görə Azərbaycanı tənqid etməsini rəsmi Bakı təmsilçiləri həmişəki kimi “erməni lobbisinin anti-Azərbaycan işi” kimi dəyərləndiriblər.

“Exo”  Azərbaycanda istehlakçı etimadı indeksinin enməsini, əhalinin əksər hissəsinin “qənaət və özünü qorumaq rejimi”nə keçdiyini önə çəkir.

“Novoe Vremya”  ölkədə korrupsiyanın dərinə işlədiyini yazaraq bu sahədə “hakimiyyət məmurlar arasında korrupsiyanı sıxışdıra bilərmi?” sualını gündəmə gətirir.

Qəzet Dövlət Neft Fondunun ehtiyatlarının azalmasını “təhlükəsizlik balışının defisitdə olması” kimi şərh edir.

“Bizim yol”  “MTN işi” ilə bağlı qurumun keçmiş rəhbəri Eldar Mahmudovun tikinti şirkətlərinə 1milyon dollar “haqq” qoymasını ilk səhifəyə yerləşdirib.

Rabitə Nazirliyinin aparat rəhbəri Vidadi Zeynalovun həbsinə toxunan qəzet bunun birbaşa “MTN işi” ilə əlaqəli olduğu iddiasını diqqətə çatdırır.

“Yeni Müsavat” “MTN işi” ilə bağlı aparılan həbsləri MTN-in keçmiş şefi Eldar Mahmudovun yaxın adamlarının həbsı sayaraq ilk səhifəyə çıxarıb.

Rəsmi Bakı siyasi məhbusları azadlığa buraxsa sanksiya tətbiqi təzyiqindən qurtara biləcəyini “Azərbaycan üçün Belarus modeli” kimi şərh edir.

Bu günlərdə Bakıdakı “Farklı Lahmacun” kafesində saxlanılan 42 vəhabidən 3-nə cinayət işi başlanılıb, Türkiyədə isə antiterror əməliyyatı zamanı saxlanılanların arasında 2 nəfə Azərbaycan vətəndaşının olduğu bildirilir.

2005-ci ildə ömürlük həbsə məhkum edilən, amma MTN təcridxanasında saxlanılan Hacı Məmmədovun Qobustan həbsxanasına köçürüləcəyi gözlənilir.