Mətbuat-Monitorinq 29.09.15

Rəsmi qəzetlər dövlət başçısı İlham Əliyevin qəbulları, beynəlxalq “Cənub-Cənub” mükafatı ilə təltif edilməsi haqda xəbərləri ilk səhifələrdə yerləşdiriblər.

“Azərbaycan” qəzeti ABŞ prezidenti Obamanı islam dünyasına qarşı qəddar siyasət yürütməkdə suçlayan məqalə dərc edib.

“Azadlıq” qəzeti AŞPA sessiyasının “son iki ildə Azərbaycanda həyəcan doğuran hadisələr baş verməsi” mövqeyilə Əliyev hökumətini tənqidlə başlamasını manjetə çıxarıb.

Dinc aksiyaları güc vasitəsilə yatıran hökumətləri qorxaq adlandıran ABŞ prezidenti Obama belə rejimlərin son nəticədə dağıldığını bəyan edib.

Dövlət başçısı İlham Əliyevin turizm sektorunda qiymətlərin bahalığını tənqid etməsinə nazir Əbülfəz Qarayev “heç kəs gözləməməlidir ki, prezidentin tənqidindən sonra nazirlik bir dəqiqənin içində əmr imzalamaqla qiymətləri 100% endirəcək, belə şey yoxdur və olmayacaq” bəyanatını səsləndirib.

Pensiya yaşının artırılması haqda xəbərlərə ekspertlər “gəlirlər azaldıqca belə üsullara əl atırlar” şərhini veriblər.

Füzuli rayon sakinləri Əhalinin Sosial Müdafiə Mərkəzinin rəhbəri Adil Həziyevi ünvanlı sosial yardımı imkansız yox, imkanlı ailələrə verməkdə suçlayırlar.

“Ekspress” Qarabağ məsələsilə bağlı Nyu-Yorkda həmsədrlərin danışıqlarından sonra cəbhədə ağır döyüşlərin başlamasını “danışıqların atəşə tutulması” kimi dəyərləndirərək ön plana çəkib.

Dövlət Sosial Müdafiə Fondunun sədri Elman Mehdiyev sığorta prinsipləri dərinləşdirilmədiyi halda ölkənin pensiya sisteminin maliyyə problemlərilə üzləşəcə biləcəyi barədə xəbərdarlıq edib.

“Novoe Vremya”  Ermənistan prezidenti Sarkisyanın Dağlıq Qarabağı Ermənistanın tərkib hissəsi elan etməsini “maskaların cırılması, Sarkisyanın özünü rüsvayçılıq sütununa bağlaması” adlandıraraq diqqət mərkəzinə çıxarıb.

Pensiya yaşı həddinin artırılmasına olan səyləri qəzet ahıl insanlara növbəti zərbə kimi dəyərləndirir.

“Bizim yol”  parlament seçkilərilə bağlı AŞPA-nın 32 nəfərlik missiyasının Azərbaycana gələcəyini ilk səhifəyə yerləşdirib.

2016-17-ci llərdə Azərbaycanda problemlərin pik  həddinə çatacağı haqda ekspertlərin bəyanatlarını qəzet “gələnilki büdcə ilə bağlı qorxulu proqnozlar” kimi qiymətləndirir.

“Yeni Müsavat”  Rusiyanın “Palmali” şirkətini İŞİD-lə əlaqələndirməsini Qərbin Azərbaycana qarşı növbəti təzyiq dalğası başlada bilməsinə səbəb olacağı iddiasını ilk səhifəyə çəkib.

Deputat Elmira Axundovanın oğlu Həbib Axundovun 8 milyon dollarlıq dələduzluğuna məruz qalan bir qrup şəxs bu məsələ ilə bağlı deputatlara müraciət ünvanlayıblar. 

64 saylı Sabirabad Dairə Seçki Komissiyasının sədri Şükür İmanov və daha 3 nəfər narkotika kolları əkmək şübhəsilə polis şöbəsinə aparılıb.

Daşkəsəndə ata-oğul Rəmayıl və Rəfayıl Əsgərovları polislərin ğözü önündə bıçaqlayan şəxslər həbsə alınmayıb.