Mətbuat-Monitorinq 29.11.12

Rəsmi qəzetlər paytaxtda idman məsələlərinə dair sərginin açılışı, dövlət başçısı və xanımının bu sərgidə iştirakı, rəsmi qəbulları haqda yazırlar.

“Azadlıq” qəzeti. PA rəhbəri Ramiz Mehdiyev rəsmi icra qurum rəhbərlərinə məktub göndərərək ölkəyə dəvət edilən xarici media mənsublarının kimliyi, hansı KİV-də çalışması, səfərin konkret tarix və məqsədi, jurnalistin gedəcəyi yer və görüşəcəyi şəxslərin siyahısı, Azərbaycan barədə yazıları, hazırlanacaq materiallar haqda PA-ya təfərrüatlı məlumat verilməsini tələb edib.  

Daxili işlər naziri Ramil Usubovun oğluna daxili işlər orqanlarında yüksək vəzifə təyinatı verməsini qəzet “sivil ölkələrdə səs-küyə səbəb olacaq təyinat” adlandırır.

Ayətüllah Xamneyi İran iqtidarının xalqla səmimi olmamasını “özləri milyardlarla dollar oğurluqları ört-basdır edir, xalqa isə ancaq axirətdən danışırlar” şəklində ifadə edib. 

ABŞ-da azərbaycanlıların cəmiyyət sədri Elmar Şahtaxtinski Meksika hökumətinə “Heydər Əliyev abidəsi qoyulmağa layiq iş görməyib” müraciətini edərək  heykəlin götürülməsinə çağırıb.

“Zerkalo” Gürcüstan azərbaycanlılarının Azərbaycanda qalma müddətinin 90 gündən 30 günə endirilməsini və bundan artıq qaldırda 400 manat cərimə olunduqlarını yazır və dövlətin heç bir qurumunun bu ədalətsizliyi aradan qaldırmaq istəməməsinə diqqət çəkir. 

“Ekspress” rəsmi Tbilisinin Abxaziyadan Ermənistana gedən dəmiryolunu açmaq istəməsi fikrindən geri durmasını “xatalı ideyadan əl çəkməsi” adlandırır. 

Keçmiş deputat Gülər Əhmədovanın sahibi olduğu “Mərkəz” qəzetinin əməkdaşları əmək haqlarını tələb etdiklərinə görə keçmiş deputat onları qovmaqla hədələyib.

“Exo” Rusiyada yaşayan etnik azərbaycanlıların sayının 2002-ci ildən azalmağa başladığının müşahidə olunduğunu yazaraq bunu “Azərbaycanlıların vətənə dönmələri” kimi dəyərləndirir. 

“Novoe Vremya” rəsmi Bakının avropalı deputatları ələ almaq üçün “kürü diplomatiyası” şərti adlı rüşvət faktorunun iflasa uğramasını “qara kürü “qara damğa”ya dönür” şəklində şərh edir.

“Bizim yol” bu ilin 1 mart hadisələrilə bağlı məhkəmədə mühakimöə olunanlara həbs cəzası istənilməsinin rayoda gərginlik yaratmasını “Qubanın yenidən üsyan ərəfəsəində olması” adlandırır.  

Qəzet büdcədən “köçkünlər” adı ilə ayrılan 1.3 milyard manat vəsaitin taleyinin məlum olmamasını neft pullarını bu adla talan olunması kimi dəyərləndirir. 

“Yeni Müsavat”. Keçmiş rektor Elşad Abdullayevin qardaşı Mahir Abdullayevin 2003-cü ildə itkin düşməsilə bağlı ordu generalı Məmməd Beydullayev istintaqa çağırılıb, yüzlərlə adam dindirilib. 

Deputat Fazil Mustafa Zaqataladakı zəlzələ bölgəsində evlərin tikintisinin yubandığını və bunun əhali arasında narahatlıq yaratdığını bildirib. 

Keçmiş deputat Gülər Əhmədovanın ittihamı əsasında hazırda məhkəmə mühakiməsi davam edən “Xural” qəzetinin redaktoru Əvəz Zeynallı deputatın onunla bağlı məqalə yazan jurnalistin atasının üstünə silahlı adamlar göndərdiyini bildirib.