Mətbuat-Monitorinq 30.03.13

Rəsmi və hökumətyönlü qəzetlər dövlət başçısı İlham Əliyevin Füzuli küçəsindəki “qış bulvarı” parkında tikinti, “Atəşgah məbədi” qoruğunda təmir-bərpa işlərinin gedişilə maraqlanması haqda yazırlar.

Bu qəzetlərdə iqtidar mənsubları müxalif qurumları və onların təmsilçilərini “ifrat radikallıq”da ittiham edirlər. Onları antimilli, antixalq siyasətdə suçlayırlar. 

“Azadlıq” qəzeti ABŞ dövlət katibinin Azərbaycan XİN başçısına zəng etməsi haqda yayılan xəbərləri həm Dövlət Departamenti, həm də Azərbaycan XİN-in təkzib etməsini “iki dövlət arasında diplomatik qalmaqal” adlandırır.

Sumqayıt polisi həbsə aldığı AXCP-çi gənc fəal Daşqın Məlikovun ailəsinə məxsus təqaüd kartlarını sahiblərinə qaytarmaq istəmir.    

Azərbaycanın yandırmaq üçün xaricdən odun alması “ölkənin 90%-nin qazlaşdırılması ilə bağlı iddiaların yalan olması” kimi dəyərləndirilir.   

“Texnikabank”ın filial müdirinin müavini, AXCP sədri Əli Kərimlinin qaynı Elnur Seyidovun barəsində məhkəmə müdafiə tərəfin heç bir vəsatətini təmin etməyib.

“Zerkalo”  Azərbaycan-Türkiyə-Gürcüstan “üçlüyü”nü “real mövcud olan regional inteqrasiya formatı” kimi dəyərləndirir.

Rəsmi Bakının beynəlxalq qurumları sıxışdırmasına toxunan ekspertlər bunun seçkilərlə bağlı olmasına ““seçkilərə hazırlığın” var gücülə getməsi” ironiyası ilə işarə edirlər.

“Eksperss” ölkədə qənd satışına toxunaraq Azərbaycan bazarında təmiz qəndin olmadığını bildirirlər.

“Exo” hər işləyən şəxsə 1500 dollar bank əmanəti düşdüyünü yazaraq bu göstəricinin adambaşına 710 dollar təşkil etdiyini, amma bunun Avropa və Rusiyanın göstəricilərindən aşağı olduğunu bildirir.

“Novoe Vremya” rəsmi Bakının ABŞ MDİ-nin verdiyi qrantlara görə ittihamlarına “qrantların çoxu hökumətyönlü QHT-lərə verilir, o zaman iqtidarı həyəcanlandıran nədir?” sualı ilə qarşılıq verir.

“Bizim yol” İqtisad və Dillər universitetlərində tələbələrə aylarla təqaüdün verilməməsini “ali məktəblərdə təqaüd böhranı” adlandırır.

Deputat Hüseynbala Mirələmova məxsus “1001” gecə restoranındakı qətlə görə deputatın qardaşı oğlu həbsə alınıb, bu restoranda narkotik maddə  satışı aşkarlanıb. 

“Yeni Müsavat”  Dillər Uuniversitetinin 3 aydır ki, təqaüd ala bilməyən tələbələrinin aprelin 9-dan 12-nə kimi dinc aksiya keçirmək qərarını “təqaüd üsyanı” kimi dəyərləndirir.