Mətbuat-Monitorinq 30.05.14

Rəsmi qəzetlər dövlət başçısı İlham Əliyevin Neftçala rayonuna səfəri haqda xəbərləri ilk səhifələrdə yerləşdiriblər. Bundan əlavə, Neftçala rayonunun sosial-iqtisadi inkişafı üçün 2 milyon, rayonun Şorkənd-Bankə-Şiravanlı avtomobil yolunun çəkilişi üçün 3 milyon manatın ayrılması haqda sərəncamların mətnlərini dərc ediblər.

“Azadlıq” qəzeti Azərbaycandakı repressiyaların dünyanı hərəkətə gətirməsi və Əliyev rejiminə beynəlxalq təzyiqin artması xəbərini manjetə çıxarıb.

Türkdilli Dövlətlərin Əməkdaşlıq Şurasının iyunun 5-də Türkiyədə sammitinin keçiriləcəyini yazan qəzet Özbəkistan istisna olmaqla qalan türk dövlətləri başçılarının tədbirə qatrılacaqlarını bildirir.

ABŞ prezidenti Barak Obama güc tətbiqinə yol verənlərlə onların öz dilində danışılacağı haqda bəyanat səsləndirib.  

Daxili qoşunlarda 1 ay xidmət edən əsgər Samiq Məmmədov vəfat edib, hərbi komissarlıq isə əsgərin hərbi xidmətə gedərkən sağlam olduğunu bildirir.  

QHT rəhbəri Anar Məmmədlinin həbsinə etiraz edən Böyük Britaniya Azərbaycanı “ədalət prinsipinə hörmətə və mövcud tendensiyanı dəyişməyə” çağırıb.

“Ekspress”  aprel ayında əsgər gedən Samiq Məmmədovun may ayında xəstələnərək dünyasını dəyişməsi xəbərini ilk səhifəyə çıxarıb.

RF-nin Ermənistan səfiri Rusiyanın Azərbaycana silah satmasını “kommersiya məsələsi olması” kimi dəyərləndirib.

İranın xüsusi xidmət orqanları Təbrizin “Laçın” qrupunun İstanbulda keçiriləcək Türk Dünyası Uşaq Festifalında iştirakına icazə verməyib.

“Exo”  Gürcüstanda azərbaycanlıların kompakt yaşadıqları Qardabanidə 200-ə yaxın gürcü və azərbaycanlının davasının etnik yox, siyasi əsaslı olmasını iönə çəkib.

“Novoe Vremya”  Azərbaycanda inhisar əleyhinə rəsmi qurumların olmasına baxmayaraq, hər hansı mübarizə aparılmadığına diqqət çəkərək bu qurumlara “Antiinhisar idarələri: absurd teatrı” münasibətini ifadə edir.

“Bizim yol”  Qazaxıstanda Avrasiya İqtisadi Birliyinin yaradılmasını önə verərək faktı “Putinin yeni SSRİ-nin əsasını qoyması” kimi dəyərləndirir.

Mərkəzi Bankın kredit qadağası tətbiqinə toxunan qəzet ekspertlərə istinadən bu qadağanın 10 bankın 350 milyon manat vəsaitinin qaytarılmaması ilə bağlı olduğunu bildirir.

Bu il dolu və leysanların kənd təsərrüfatına ciddi ziyan vurduğunu yazan qəzet ona görə də bu il meyvənin “od qiyməti”nə olacağını iddia edir.     

“Yeni Müsavat”  Belarus, Qazaxıstan və Rusiyanın “Avrasiya İttifaqı”nı təsis etməsini önə çəkərək fakta ““Yeni SSRİ” təsis olundu, paytaxtı yenə Moskvadır” münasibətini ifadə edir.

Ölkənin hüquq-mühafizə orqanları orta məktəblərdə “son zəng”lə bağlı məzun törənlərinin ancaq məktəblərdə keçiriləcəyi barədə açıqlama veriblər.

Virtualaz.org saytının QHT rəhbərləri Qubad İbadoğlu və Zöhrab İsmayılı ermənilərlə əməkdaşlqda suçlamasını qarşı tərəf “yazılanların müəyyən dairələrin sifarişilə ortaya çıxması” kimi dəyərləndiriblər.

Qəzet ölkədə 1,6 milyon ha sahədə taxıl əkildiyini, biçin üçün 4 min kombayn lazım gəldiyi halda ölkədə cəmi 2 minə yaxın kombaynın olduğunu nəzərə çatdırır.