Azərbaycanda 738 özəl şirkətin 100-dən çox işçisi var

Azərbaycanda 42 özəl şirkətin işçilərinin sayı 1 000 nəfərdən çoxdur. «Evrascon» Avrasiya tikinti şirkətində 5423 nəfərlə müqavilə bağlanılıb. 3 ayda 118 nəfər işdən çıxarılıb.

Vergilər Nazirliyinin məlumatına görə, ölkədə 738 özəl şirkətin  100-dən çox işçisi var.  

“Silk Way Airlines” aviaşirkətində 4801 nəfər işləyir. Mart-mayda burda 300 nəfər işə qəbul edilib. “Silk Way Group” şirkətlər qrupunda (“Silk Way Helicopter Services”, “Bank Silk Way”, “Silk Way Business Aviation”, “Duty Free.Az”) 5700 nəfər çalışır.

İlin əvvəlində “AZENCO” ASC şirkətlər qrupu («Sumqayıt Texnologiyalar Parkı» bura daxildir - 3781 nəfər) maliyyə problemi yaşayıb. Nəticədə 3 ayda 800 nəfər işdən çıxarılıb. Hazırda “AZENCO” qrupunda 3400 nəfər işləyir.

“BP Exploration-da (Caspian Sea) Limited” işçi sayı artır. Martda burda 3309 nəfər işçi olub, ötən dövrdə 30 nəfər işə qəbul edilib.

 «Akkord» korporasiyasında bir sıra layihələr bitdiyi üçün 150 işçi ilə müqavilə pozulub. Nəticədə işçi sayı 3151 nəfərə düşüb. Korporasiyaya daxil olan “Qazax Sement Zavodu”nda 300 nəfərdən çox işçi çalışır.

  Aparıcı işəgötürənlər onluğuna “Azpetrol ltd” MMC (3046 nəfər, + 69),  “Trust –S.S”  (2495 nəfər), Azərbaycan-Türkiyə BM “AzFen” (2457) və “Boss Shelf” (2434) də daxildir.

“Embawood” mebel kombinatı (2028 işçi, +25) və “Veysəloğlu” şirkətində (2051, +151) işçi sayı artıb.

“SOCAR Petroleum” QSC və “Baku Steel Company” MMC-nin heyətində azalma olub. Martda  “SOCAR Petroleum”da 1421 nəfər,  “Baku Steel Company”də 1861 nəfər çalışıb, mayın sonunda onların sayı 1395 və 1481 nəfərə düşüb.

“AzVirt” MMC yol tikintisi şirkətində sabitlikdir – burda 1547 nəfər çalışır.

Mobil telefon operatorlarının işçi sayı (”Azercell Telecom”, “Bakcell” və “Azerfon”) mart-mayda 7,2% artaraq 2412 nəfərə çatıb.-08B--