Mətbuat-monitorinq 30.07.15

Rəsmi qəzetlər ölkənin dinamik inkişaf etməsi haqda hakimiyyət rakursunun marağında olan təbliğat mövzulu yazıları ilk səhifələrdə yerləşdiriblər. 

“Azadlıq” qəzeti bəzi məmurların vergi borclarını az ödəməsilə bağlı araşdırmalar başladığını yazaraq, bunu “İlham Əliyevin komandasında maliyyə xəyanətindən şübhələnməsi” kimi ilk səhifəyə çıxarıb.

Qəzet ekspetlərə isnadən iqtidar komandası daxilində çaxnaşma olacağı üçün İlham Əliyevin  korrupsiyaya qarşı mübarizə aparmaq gücündə olmadığını yazır.     

Avropa Parlamentinin Azərbaycanda seçkiləri müşahidə etməyə nümayəndə göndərməmək qərarını qəzet qurumun seçkilərin demokratik keçiriləcəyinə şübhə ilə yanaşması ilə əlaqələndirir.

“Meydan TV” və “Azərbaycan saatı” proqramının rəhbərləri Emin Milli və Qənimət Zahidin yaxınlarının siyasi repressiyaya məruz qalması ilə bağlı ABŞ Dövlət Departamenti rəsmi Bakını “öz vətəndaşlarının hüquqlarına hörmət etməyə” çağırıb.

Ekspertlər Mərkəzi Banka pul-kredit siyasətini qısa müddətdə tənzimləmədiyi halda bankların mövcud problemlərinin ciddi sosial-iqtisadi fəsad yaradacağı xəbərdarlığı ediblər.

Qəzet sosial problemlərə görə vətəndaşların özlərini yandıraraq intihar etmələrini səhv siyasətin nəticəsi sayaraq, onu “vətəndaşa ölüm vəd edən siyasət” adlandırır.

Qəzet keçən ilin eyni dövrü ilə müqayisədə bu ilin ilk yarısında Neft Fondunun gəlirlərinin (8,3-3,9 milyard dollar) 2 dəfə azaldığını bildirir.    

Ölkə üzrə törədilən cinayətlərdə 14-18 yaşlı uşaqların xüsusi çəkisinin artmasını ekspertlər qəzetə “sosial durumun ağırlığı və təhsilsizliyin nəticəsi” kimi şərh ediblər.

Qəzet Suriyada döyüşlərdən qayıdan Dağıstanlı şəxsin açıqlamalarına əsasən, “Şeyx Süleyman” düşərgəsi rəhbərinin Azərbaycan prezidentinin keçmiş mühafizəçisi olduğunu yazır.

“Ekspress” qəzeti Müdafiə Nazirliyi Baş Hərbi İnspeksiyasının bir qrup əməkdaşı barədə cinayət işi başlamasını diqqət mərkəzinə çəkib.

Qəzet ekspertlərə isnadən dünya bazarında qızılın ucuzlaşmasının Neft Fonduna 100 milyon dollar ziyan vurduğunu bildirir.

“Exo” qəzeti Rusiyalı ekspertlərə isnadən İŞİD terrorçularının Naxçıvana keçə biləcəkləri xəbərdarlığı edir və bunu “İŞİD-in Azərbaycana real təhlükə olması kimi ön plana çıxarır.

Qəzet qeyd edir ki, mütəxəssislər Azərbaycanda yetişdirilən qarpızların 98%-nin genləri dəyişdirilmiş məhsul olduğunu bildirir.

“Novoe Vremya” qəzeti Avropa Parlamentinin Azərbaycanda parlament seşkilərini müşahidədən imtina etməsini önə çəkib.

“Bizim yol” qəzeti “Bank Technique”da bütün əməliyyatların dayandırılmasının yaratdığı “əhalinin əmanətlərinin taleyi necə olacacaq?” sualını ilk səhifəyə yerləşdirib.

Ekspertlər Kreml layihəsi olan Avrasiya İttifaqı Hərəkatı tərəfdarlarının Azərbaycanda fəallaşmasını “beşinci kolon” üzvlərinin açıq müstəviyə keçməsi kimi dəyərləndirirlər.

“Yeni Müsavat” qəzeti Kreml layihəsi olan Avrasiya İttifaqı Hərəkatı fəallarının Azərbaycanda fəallaşmasına səbəb kimi bu regionda başlayan təhlükəli proseslərin başlaması iddiasını ilk səhifəyə çıxarıb.

Qəzet gömrük və vergi qurumları rəhbərlərinin sahibkarlarla görüşlərini hakimiyyətin gömrük və vergidə islahatlara getməsi kimi nəzərə çatdırır.

Qəzet korrupsiya faktları ilə bağlı Müdafiə Nazirliyi Baş Hərbi İnspeksiyasının yüksək rütbəli 3 qulluqçusunun həbs edildiyini nəzərə çatdırır.

Hazırda Avropada mühacir həyatı yaşayan keçmiş vivcdan məhbusu Mirzə Sakit qohumlarının həbsdən buraxılması üçün qardaşı Qənimət Zahidin rəhbəri olduğu “Azərbaycan saatı” proqramının yayımının dayandırılmasını tələb edib.