Mətbuat-Monitorinq 30.11.12

Rəsmi qəzetlər dövlət başçısı İlham Əliyevin bəzi ölkələrin səfirlərinin etimadnamələrini qəbul etməsi, bəzui qanunlara dəyişikliklər edilməsi  ilə bağlı fərmanlar imzalaması, Milli Konservatoriyanın inzibati binasının tikilməsi üçün 3 milyon manatın ayrılması haqda sərəncam verməsi barədə yazırlar. 

“Yeni Azərbaycan” qəzeti bp-ni rəsmi Bakının əleyhinə fəaliyyətdə ittiham edən irihəcmli “Sifarişli siyasi qara piar, yaxud bp Azərbaycanın neft konsorsiuminda operatorluqdan məhrum ediləcəkmi?” məqaləsini dərc edib.

“Azadlıq” qəzeti “Time” jurnalına istinadən Suriya iqtidarına dəstək üçün Azərbaycan vasitəsilə silah daşındığını yazır  və bu xətti “gizli marşrut” adlandırır. 

ABŞ Beynəlxalq İnkişaf Agentliyinin rəsmi Bakıya 1,5 milyon dollar qrant ayırmasına görə Azərbaycanın 11 təşkilatı USAİD-ə etiraz edib. 

Tanınmış hüquqşünas İntiqam Əliyev beynəlxalq qurum təmsilçilərinin Azərbaycanda insan haqlarına laqeydliklərinə görə “bu adamlara layiq olduqları münasibəti göstərmək lazımdır” mövqeyini ifadə edib. 

Dövlət Neft Şirkəti Türkiyədə kürd əsilli Mahsun Qırmızıgülün çəkdiyi seriala sponsorluq edir. 

Tarixçi-professor Cəmil Həsənli iqtidarın ölkədəki müxalif siyasi qüvvələrə qəddarlığını “bu iqtidar ermənilərə qarşı edə bilmədiklərini müxalifətə edib” şəklində şərh edib.

“Zerkalo” AŞPA-nın Azərbaycan üzrə həmməruzəçilərinin Azərbaycana səfərlərinin əsas məsələlərindən birinin həbsdə olan islamçıların siyasi məhbus sayılıb-sayılmaması olduğunu qeyd edir. 

“Ekspress” Azərbaycanda büdcənin 60, Qazaxıstanda isə 25%-ni neft pullarının təşkil etdiyini yazaraq bu fakta “kim necə istifadə edir?” mövqeyini bildirir. 

“Exo” ölkə vətəndaşlarının əlində təqribən 5 milyard manata yaxın nəqd pul kütləsinin toplandığını yazaraq bu məbləğin əhalinin bank əmantələrinin həcmindən çox olduğunu qeyd edir.  

“Novoe Vremya”  AŞPA-nın Azərbaycan üzrə həmməruzəçilərinin ölkəyə son səfərində vətəndaş cəmiyyəti institutlarının təmsilçiləri ilə görüşləri nəzərdə tutmamasını “qara kürü” həvəskarlarının Azərbaycanda hoqqaları” kimi  dəyərləndirir. 

“Bizim yol”  YAP funksionerlərinə istinadən YAP-da Əliyevin namizədliyilə bağlı tərəddüdlərin olduğunu bildirir. 

Gənc Tamaşaçılar Teatrının aktyoru İlqar Cahangirov hakimiyyəti ədalətsizlik və riyakarlıqda tənqid etdiyinə görə işlədiyi teatrdan çıxarılıb. 

“Yeni Müsavat” son vaxtlar bp-nin tənqidə məruz qalmasını bp ilə iqtidar arasında “davanın yenidən qızışması” kimi dəyərləndirir və rəsmi Bakının neft nəhəngini Xəzərdəki iri layihədən çıxarmaq istədiyini iddia edir.

Azərbaycanda PKK-nın təbliğatçısı olan “Diplomat” qəzetinin redaktoru Tahir Süleymanov Rusiya və başqa ölkələrdəki kürdlərdən “niyə susmusuz, niyə dillənmirsiniz” etirazlarını eşitdikləri haqda açıqlama verib.